اسلام آباد – 25 – آڪٽوبر (اي پي پي) ڪشمير جو تاسيس جو ڏهاڙو وچن ورجائڻ جو ڏهاڙو آهي، ڪشمير جي مسئلي تان پٺتي هٽڻ جو ڪير تصور نه ٿو ڪري سگهي، ڪشميري قيادت کي گڏجي ڪشمير جي آزادي جي لاءِ پنهنجو ڪردار ادا ڪرڻ گهرجي، ڪشميري اڄ به آزادي جهڙي بنيادي حق کان محروم آهن جن کي غضب نه ٿو ڪري سگهجي، پوري قوم ۽ قيادت ڪشمير جي وحدت ۽ خودمختياري جي حق جي ايجنڊا تي متحد ۽ متفق آهي. اهڙن خيالن جو اظهار مقررين ڪشمير جي تاسيس ڏهاڙي جي حوالي سان ڪشمير جرنلسٽس فورم جي اهتمام هيٺ ”ڪشمير جي آزادي جي جدوجهد ۽ قومي قيادت جون ذميواريون“ جي عنوان سان نيشنل پريس ڪلب ۾ سيمينار کي خطاب ڪندي ڪيو. سيمينار ۾ مسلم ليگ (ن) آزاد ڪشمير جي صدر ۽ قانونساز اسيمبلي جي اڳوڻي اسپيڪر شاهه غلام قادر، امير جماعت اسلامي آزاد ڪشمير ۽ گلگت بلتستان ڊاڪٽر خالد محمود، حريت اڳواڻ ياسين ملڪ جي گهرواريءَ مشعال ملڪ، تحريڪ انصاف آزاد ڪشمير جي جنرل سيڪريٽري ۽ چيئرمين عملدرآمد معائنه ڪميشن راجا منصور خان، حريت اڳواڻ سيد يوسف نسيم، حريت اڳواڻ امتياز واني، سينيئر صحافي ۽ اينڪرپرسن ثمر عباس، نيشنل پريس ڪلب جي سيڪريٽري راجا خليل، عديل بشير، سردار سوڪت محمود، فورم جي صدر خاور نواز راجا، جنرل سيڪريٽري عقيل انجم خطاب ڪيو. سيمينار ۾ قرارداد پيش ڪئي جنهن ۾ چيو ويو ته ڀارت پاران والاريل ڪشمير ۾ اظهار جي آزادي کي دٻائڻ، اخبارن جي بندش، سوشل ميڊيا جي استعمال تي پابندي کانسواءِ ياسين ملڪ سميت ڪيترن ئي حريت ڪانفرنس جي قيادت جيڪا جيلن ۾ آهي، انهن سان غيرانساني سلوڪ جي ڀرپور مذمت ڪريون ٿا، ڪشميري ڄائي عورت ثنا ارشد متو کي آمريڪا پاران ايوارڊ جي لاءِ وڃڻ تي ڀارتي حڪومت پاران روڪڻ جي پڻ مذمت ڪريون ٿا، ڪي جي ايف سينيئر صحافي ارشد شريف جي قتل جي شفاف جاچ ۽ جوڊيشل ڪميشن ٺاهڻ جو مطالبو ڪري ٿو. سيمينار کي خطاب ڪندي شاهه غلام قادر چيو ته 24 آڪٽوبر 1947ع ۾ آزاد ڪشمير جو جيڪو حصو آزاد ڪرايو ويو 75 سالن ۾ اسان ان خطي جي تعمير ۽ ترقي جي لاءِ ڪا ڪسر نه ڇڏي، اهو تاثر ڏنو پيو وڃي ته ڪشمير مسئلي جي لاءِ بيس ڪئمپ خاص طور تي سياسي ۽ مذهبي قيادت کي جيڪي ذميواريون ڏنيون ويون اهي مڪمل ناڪام رهيا، ائين نه آهي، آزاد ڪشمير ۽ پاڪستان جي ڪا به سياسي پارٽي ڪشمير مسئلي کي سردخاني ور نه ٿي چاڙهي سگهي. هن چيو ته آزاد ڪشمير ۽ والاريل ڪشمير جو هر ليڊر پنهنجي سگهه موجب ڪشمير جي آزادي جي تحريڪ جي لاءِ ڪم ڪري رهيو آهي، اهڙي صورت ۾ صحافين جي به اها ذميواري اهي ته اهي ڪشمير مسئلي کي اجاگر ڪرڻ جي لاءِ پنهنجو ڪردار ادا ڪن. ڊاڪٽر خالد محمود خان ۽ ٻين چيو ته قومن جي زندگين ۾ ڪجهه اهڙا موقعا ايندا آهن جيڪي نه رڳو انهن کي ماضي جي ياد ڏياريندي مستقبل جي سفر ۾ آسانيون پيدا ڪن ٿا پر اهي موقعا قومن جي تقدير بدلائڻ ۾ سنگ ميل جي حيثيت رکن ٿا. 24 آڪٽوبر رڳو آزاد ڄمون ۽ ڪشمير جو تاسيس جو ڏهاڙو ئي نه آهي پر هي اهو خاص ڏينهن آهي جيڪو ياد ڏياري ٿو ته ڪشميرين خودمختياري جو هق حاصل ڪرڻ جي لاءِ جيڪي رت جا ڏيئا ٻاريا هئا اهي اڃا تائين روشن آهن. آڪٽوبر 1947ع جو ڏينهن يقينن هڪ تاريخي ڏينهن آهي، انهي ڏينهن جنجال هل (سدهنوتي) جي جڳهه تي غازي ملت سردار محمد ابراهيم خان جي قيادت ۾ آزاد حڪومت رياست ڄمون ۽ ڪشمير قائم ڪئي وئي. نريندر مودي هندستان جي نام نهاد جمهوري ۽ سيڪيولر چهري تان نقاب لاهي ڇڏيو آهي، برهمڻ سامراج هندستان کي انجام طرف وٺي وڃي رهيو آهي، ڪشمير آزاد ٿيندو ۽ ننڍي کنڊ جو جغرافيه تبديل ڪرڻ جو عنوان بڻجندو، الله جي نصرت، محمد ﷺ جي غلامي ۽ شهيدن جي مقدس رت جي طفيل ڪشمير جلد يا دير آزاد ٿيندو، 5 لک شهيدن جي رت سان بيوفائي ڪندڙ عبرت جو نشان بڻجندا، ڪشمير واسي حرمين کانپوءِ پاڪستان سان محبت ڪن ٿا. ڊاڪٽر خالد محمود چيو ته ڀارت جي غيرقانوني قبضي هيٺ ڄمون ۽ ڪشمير ۾ ظلمن جي انتها ٿي رهي آهي ۽ هتي خاموشي ڏسي آزاد ڪشمير جا نوجوان تڙپي رهيا آهن، هڪ طرف مودي پنهنجي ايجنڊا کي اڳتي وڌائي رهيو آهي ۽ ٻئي طرف ڪائونٽر روڊ ميپ نه هجڻ جي ڪري مايوسي جو پيغام وڃي رهيو آهي، مون آزاد ڪشمير جي نوجوانن جي اکين ۾ شعلا ڏٺا آهن جڏهن اهو چيو وڃي ٿو ته ڪشمير ورڇ جي ايجنڊا اڳتي ڌي رهي آهي، ڪشميري ڪشمير جي وحدت ۽ خودمختياري جي هق تي ڪو ٺاهه نه ڪندا، پوري قوم ۽ قيادت ڪشمير جي قومي وحدت ۽ خودمختياري جي حق جي ايجنڊا تي متحد ۽ متفق آهي. مقررين چيو ته ڪشمير جو تاسيس ڏهاڙو تجديد ڏهاڙو آهي، ڪشمير جي مسئلي تان پٺتي هٽڻ جو ڪير تصور نه ٿو ڪري سگهي، ڪشميري قيادت کي هڪ ٿي ڪشمير جي آزادي جي لاءِ پنهنجو ڪردار ادا ڪرڻ گهرجي، ڪشميري اڄ به آزادي جهڙي بنيادي حق کان محروم آهن جنهن کي سلب نه ٿو ڪري سگهجي، پوري قوم ۽ قيادت ڪشمير جي وحدت ۽ خودمختياري جي حق جي ايجنڊا تي متحد ۽ متفق آهي. هنن ڪشمير جرنلسٽس فورم جي عهديدارن ۽ انتظاميا کي تاسيس جي ڏهاڙي جي موقعي تي سيمينار ڪرڻ تي مبارڪباد ڏني. ڪانفرنس ۾ فورم جي عهديدارن ۽ ميمبرن اي ڪي اين ايس جي صدر سردار زاهد تبسم، اعجاز عباسي، راجا بشير عثماني، شهزاد راٺور، نعيم اسد، نديم صديق، شوڪت علي، سيد علي حسنين نقوي، شهزاد خان لياقت مغل، شبير ڊار، ڪاشف مير، خالد گرديزي، آصف چوهاڻ، نجيب الغفور، ظهير مغل، اعجاز خان، اقبال اعواڻ، سردار طلحيٰ جاويد، سردار نثار تبسم، عامر اقبال هاشمي ۽ ٻين شرڪت ڪئي.
