سمر قند۔15ستمبر (اے پی پی):وزیر اعظم محمد شہباز شریف ازبکستان دے دورے دے موقع تے ہوائی اݙے توں سدھے سمرقند اچ حضرت خضر کمپلیکس ڳئے تے ازبکستان دے بانی رہنما اسلام کریموف دے مزار تے حاضری ݙتی ۔ایں موقع تے ازبکستان دی اعلی قیادت،وزیر دفاع خواجہ آصف اتے وزیر خزانہ مفتاح اسماعیل وی انہاں دے رلے ہن ۔وزیر اعظم ازبکستان دے بانی اسلام کریموف دے مزار تے حاضری ݙتی تے فاتحہ پڑھی۔اٹھویں صدی اچ تعمیر تھیوݨ آلی مسیت خضر فن تعمیر دا بہترین شاہکار اے۔ واضح رہے جو وزیر اعظم محمد شہباز شریف شنگھائی تعاون تنظیم دے سربراہانِ مملکت دے سالانہ اجلاس اچ شرکت کیتے ݙو ݙینھ دے دورے تے سمرقند پڄن ۔وزیر اعظم آفس دے میڈیا ونگ توں جاری بیان موجب دورے اچ وزیرِ اعظم صدر تاجکستان امام علی رحمن اتے صدر ازبکستان شوکت مرزئیوف نال انڄ انڄ ملاقات کریسن ۔بعد اچ وزیراعظم روسی صدر ولادیمیر پیوٹن نال ملاقات کریسن ۔وزیرِ اعظم ایرانی صدر ابراہیم رئیسی، بیلا روس دے صدر الیگزینڈر گریگوری-وچ لوکا-شینکو اتے صدر کرغستان سیدر جاپاروف نال وی انڄ انڄ ملاقات کریسن ۔ ایں توں بعد وزیرِ اعظم ازبک صدر دی طرفوں سربراہانِ ممالک دے اعزاز اچ ݙتے ڳئے عشائیہ اچ شرکت کریسن ۔عشائیے دے بعد وزیراعظم ترکیہ دے صدررجب طیب اردگان نال ملاقات کریسن۔
