اسلام آباد۔15نومبر (اے پی پی) نگران وزیراعظم انوار الحق کاکڑ جدید دور دے درپیش چیلنجزنال موثر طریقے نال نبݨݨ دی اہمیت کوں نشابر کریندے ہوئیں آکھیے جو پاکستان کوں معاشی طورتے تکڑا بݨاوݨ ، نینگراں دیاں صلاحیتاں بھرپور انداز اچ استعمال اچ گھن آوݨ تے ترقی کیتے بنیادی ڈھانچے دی تعمیر سانڳے جامع اقدامات ویلھے دی لوڑھ ہن ، بھارت خطے اچ محاذآرائی اتے عدم استحکام کوں ہوا ݙیندا پئے ، بھارت اچ اقلیتاں کوں وݙے اوکھے حالات دا سامݨا اے ،پاکستان عالمی امن سانڳے آپݨا کردار ادا کریندا رہ ویسی ۔ او ٻدھ کوں اسلام آباد پالیسی ریسرچ انسٹیٹیوٹ دے اہتمام نال مارگلہ ڈائیلاگ توں خطاب کریندے پئے ہن ۔ نگران وزیراعظم آکھیے جدید دوراچ پیش آوݨ آلے چیلنجزنال نبݨݨا ہوسی ۔ پاکستان24 کروڑ دی آبادی داملک اے جیں دی آبادی دا 65 فیصد 30 سال توں گھٹ عمر اے ، انہاں دیاں صلاحیتاں معاشی طور تے استعمال اچ گھن آوݨیاں چاہیدن ۔ اساں آپݨے انسانی وسائل دی ترقی تے ہنر مندی دی تعلیم اچ پچھوں ہیسے تاں جو صنعتی شعبہ تے تارکین وطن ملکی معیشت اچ چنڳاں کردار ادا کریندے پئن ، انہاں آکھیے جو پاکستان قدرتی وسائل توں مالا مال ملک اے جیں کوں معاشی طور تے مزید مستحکم بݨاوݨ تے انہاں قدرتی وسائل کوں ملک سانڳے کامیابی اچ ڈھالݨ دی لوڑھ اے ایندے نال ترقی کیتے بنیادی ڈھانچے دی تعمیر ویلھے دی اہم لوڑھ اے ۔ انہاں آکھیے جو جدید دوراچ خطے اچ رابطے تے راہداریاں دی ٻہوں اہمیت اے ، انہاں نال تجارتی سرگرمیاں اچ ودھارا تھیسی ۔ ماحولیاتی تبدیلیاں دے چیلنجز دا ذکر کریندے ہوئیں انہاں آکھیے اے ھک مستقل خطرے دے طور تے ابھر تے سامݨے آئن ، انہاں دے نال نبݨݨ کہیں ھک ملک کیتے ممکن کائنی۔ ماحولیاتی تبدیلیاں نال نبݨݨ سانڳے مربوط تعاون دی لوڑھ اے ۔ ماحولیاتی تبدیلیاں دے منفی اثرات گھٹ کرݨ سانگے اقوام عالم کوں اقدامات کرݨے ہوسن ۔بین الاقوامی اتے علاقائی صورتحال دے حوالے نال ڳالھ مہاڑ کریندے ہوئیں نگران وزیر اعظم آکھیے پاکستان عالمی امن سانڳے آپݨا کردار ادا کریندا رہسی ۔ انہاں آکھیے بھارت خطے اچ محاذآرائی اتے عدم استحکام کوں ہوا ݙیندا پئے ، مسئلہ کشمیر کوں سنجیدہ بنیاداں تے مکاوݨ ضروری اے ۔ مسئلہ کشمیر دے حوالے نال اقوام متحدہ دیاں قرارداداں موجود ہن ۔ انہاں آکھیے فلسطین اچ نشوم ٻالاں کوں بربریت دا نشانہ بݨایا ویندا پئے ۔ کوئی وی 4700 ٻال ماریے ونڄݨ دا جواز نی ݙے سڳدا ۔ نشوم ٻالاں دے قتل نال اسرائیل اپݨی جنونیت کوں پورا کریندا پئے ۔ انہاں آکھیے دنیا اچ انصاف تھیندا نظر آوݨا چاہیدے ۔ نگران وزیر اعظم آکھیے افغانستان نال ساݙے پراݨے، دوستانہ تے بھرپی آلے تعلقات ہن۔ افغانستان اچ استحکام خطے سانڳے ضروری اے ۔ اسلام آباد پالیسی ریسرچ انسٹیٹیوٹ دے صدر ایمبیسڈر ڈاکٹر رضا محمد شرکا دا خیر مقدم کریندے ہوئیں نگران وزیراعظم انوار الحق کاکڑ دی طرفوں ڈائیلاگ اچ شرکت تے انہاں دا شکریہ ادا کیتے۔ اسلام آباد پالیسی ریسرچ انسٹیٹوٹ دے صدر نگران وزیراعظم کوں ادارے دی تازہ پبلیکیشن پیش کیتی۔
.jpg)
.jpg)
