استنبول۔13دسمبر (اے پی پی) وفاقی وزیر اطلاعات، نشریات، قومی ورثہ تے ثقافت عطاءاللہ تارڑ مصنوعی ذہانت (اے آئی) دے بہتر اتے مثبت استعمال کیتے عالمی سطح تے ریگولیٹری فریم ورک ٻݨاوݨ دی لوڑھ تے زور ݙیندیں ہوئیں آکھیا جو مصنوعی ذہانت دے بہتر اتے مثبت استعمال کیتے عالمی سطح تے ریگولیٹری فریم ورک ضروری اے، پاکستان اے آئی پالیسی کوں بہترین اخلاقی معیار نال نافذ کرݨ کیتے پرعزم اے۔ آندے سال اساݙا ہدف ݙاہ لکھ نینگراں کوں آئی ٹی دے شعبے اچ تربیت ݙیوݨ اے۔ اے آئی اے شعبے اچ اساں اڳوں ویندے پئیوں۔ ایگری ٹیک، فن ٹیک، ہیلتھ ٹیک سودھے ٻئے شعبیاں اچ ترقی تھیندی پئی اے۔ مس انفارمیشن دے چیلنجز نال نبڑݨ کیتے وݙے لینگوئج ماڈل ٻݨاوݨے پوسن۔ جمعے کوں Stratcom Summit 2024 توں خطاب کریندیں ہوئیں وفاقی وزیر اطلاعات آکھیاجو پاکستان اچ 111 ملین انٹرنیٹ صارفین، 71 ملین سوشل میڈیا صارفین اتے تقریباً 188 ملین موبائل فون صارفین ہن۔ انہاں آکھیا جو اساݙی آبادی دا 68 فیصد حصہ نینگراں تے مشتمل اے۔ انہاں آکھیا جو اساں آپݨے نینگراں کوں آئی ٹی دی مہارتاں ݙیوݨ دی کوشش کریندے پئیوں۔ وفاقی وزیر آکھیا جو نیشنل فیبرائزیشن پالیسی دے تحت پوری آبادی کوں انٹرنیٹ دی سہولت ݙتی ویندی پئی اے۔ اساݙا اگلا ہدف فائیو جی اسپیکٹرم اے۔ وفاقی وزیر اطلاعات آکھیا جو ورلڈ اکنامک فورم دی رپورٹ اچ آکھیا جو اساں عالمی خطرات اتے آپݨی نسل دے ساریاں توں وݙے چیلنج دی ڳالھ کریندوں او مس انفارمیشن اے۔ اساکوں نیچرل لینگوئج پروسیسنگ آلے پاسے ودھݨا پوسی۔ انہاں آکھیا جو پوری دنیا اچ مس انفارمیشن اتے ڈس انفارمیشن دے چیلنجز نال نبڑݨ کیتے LLMs اتے NLPs تیار کرݨے پوسن۔ انہاں آکھیا جو پاکستان دی وزارت اطلاعات و نشریات دے تحت فیکٹ چیک فورم کم کریندا پئے جو حقائق دی تصدیق کریندے۔ انہاں آکھیا جو وزارت اطلاعات دا ڈائریکٹوریٹ آف الیکٹرانک میڈیا اینڈ پبلی کیشنز حکومت دی سٹریٹجک کمیونیکیشن پالیسی دے تحت پاکستان سودھے پوری دنیا اچ رائے عامہ اتے بیانیہ تے نظر رکھیندے۔ انہاں آکھیا جو پاکستان ایگری ٹیک، فن ٹیک، ہیلتھ ٹیک، EduTech اتے GovTech اچ آپݨی اے آئی پالیسی لاگو کرݨ ویندے پئیوں۔ انہاں آکھیا جو پاکستان موسمیاتی تبدیلی توں شدید متاثر ملک اے، 2022ء دے چھل دے بعد پسماندہ علاقیاں اتے لوکاں کوں اے آئی ماڈیولز دے استعمال نال مدد کیتی ڳئی اے۔ وفاقی وزیر صحت، تعلیم، زراعت، مالیاتی اتے سماجی شعبیاں اچ مصنوعی ذہانت دے مثبت استعمال دی لوڑھ تے زور ݙتا۔ انہاں آکھیا جو ورلڈ اکنامک فورم اچ زیادہ تر رہنماواں مس انفارمیشن کوں وݙا خطرہ قرار ݙتا۔ انہاں آکھیاجو پوری دنیا کوں مس انفارمیشن دا چیلنج درپیش اے۔ مس انفارمیشن عدم استحکام، معاشی عدم استحکام اتے سلامتی دے بحران کوں جنم ݙیندی اے۔ وفاقی وزیر آکھیا جو جݙاں اساں سوشل میڈیا اتے اظہار رائے دی آزادی دی ڳالھ کریندوں تاں اینویں کیوں اے جو غزہ دا مسئلہ، مسئلہ کشمیر اتے لبنان دے لوکاں دی حالت زار کوں سوشل میڈیا تے سینسر کیتا ویندے؟ وفاقی وزیر ڈیجیٹل ڈائیلاگ پاکستان دا ذکر کریندیں ہوئیں آکھیا جو ڈیجیٹل ڈائیلاگ پاکستان اے آئی اتے لارج لینگوئج ماڈلز دا مجموعہ اے، ایں ڈائیلاگ نال اساں نہ صرف رائے عامہ کوں ودھا سڳدوں بلکہ شہریاں دی لوڑھ دا اندازہ لاوݨ دے وی قابل تھی ویندوں۔ انہاں آکھیا جو اساں سکلز ڈویلپمنٹ دے شعبہ اچ سرمایہ کاری کوں ودھاوݨے، آندے سال اساݙا ہدف ݙاہ لکھ نینگراں کوں آئی ٹی دے شعبے اچ تربیت ݙیوݨ اے۔ انہاں آکھیا جو اے آئی اے شعبے اچ اساں اڳوں ویندے پئیوں۔ ایگری ٹیک، فن ٹیک، ہیلتھ ٹیک سودھے ٻئے شعبیاں اچ ترقی تھیندی پئی اے۔ مس انفارمیشن دے چیلنجز نال نبڑݨ کیتے وݙے لینگوئج ماڈل ٻݨاوݨے پوسن۔ وفاقی وزیر اطلاعات آکھیا جو اساں پہلے ای آپݨی قومی اے آئی پالیسی کوں نافذ کرݨ آلے پاسے ہیسے۔ انہاں آکھیا جو اساں اے آئی نال زرعی شعبہ اچ ٹیکنالوجی دی حوصلہ افزائی نال فصلاں دی ودھ پیداوار کیتے کوشش کریندے پئیوں۔ انہاں آکھیا جو پاکستان چاول برآمد کرݨ آلا ملک اے۔ زراعت کوں اساݙی معیشت اچ ریڑھ دی ہڈی دی حیثیت حاصل اے۔ انہاں آکھیا جو پاکستان اچ پولیو دی صورتحال اچ بہتری کیتے وی اے آئی کوں استعمال کیتا ونڄ سڳدے۔ انہاں آکھیا جو ہیپاٹائٹس اتے کڄھ ایجھی بیماریاں ہن جنہاں دا علاج تاں موجود اے پر ایندے باوجود کھنڈدی پئن۔ ایں کیتے پاکستان دے ہیلتھ سیکٹر اچ اے آئی دا استعمال ضروری اے۔ انہاں آکھیاجو ایگری ٹیک، ایجوکیشن ٹیک، ہیلتھ ٹیک اتے فن ٹیک ہک مجموعہ ہن جو اساکوں اڳوں ڳھن تے ونج سڳدے اتے اساݙے مسئلے ختم کر سڳدے۔ انہاں آکھیا جو اساکوں درست پالیسیاں ٻݨاوݨ اتے آپݨے لوکاں اتے آپݨے ملک کیتے انہاں توں فیدہ چاوݨ دی لوڑھ اے۔
