اسلام آباد۔20مئی (اے پی پی):وزیر اعظم عمران خان چینی ہم منصب لی کی چیانگ نال ٹیلیفون تے ڳالھ مہاڑ کیتی جیں اچ پاک چین سفارتی تعلقات دے قیام دی 70 ویں سالگرہ ، ݙوطرفہ تعلقات اتے کورونا ویکسین دی فراہمی اچ تعاون تے ڳالھ مہاڑ کیتی ۔وزیر اعظم چینی ہم منصب اتے قیادت کوں مریخ تے چینی خلائی جہاز دی کامیاب لینڈنگ تے مبارخ ݙتی جیں چین دی ودھدی ہوئی تکنیکی صلاحیت کوں اجاگر کیتے۔ وزیر اعظم عمران خان زور ݙے تے آکھیے جو گزریل سالاں دے دوران اجتماعی اتے ودھ ساریاں کوششاں نال پاکستان تے چین اپݨے تعلقات کوں سدابہار تذویراتی شراکت داری اچ بدال ݙتے ۔ چین پاکستان اقتصادی راہداری (سی پیک) بیلٹ اینڈ روڈ انیشی ایٹو دا فلیگ شپ منصوبہ اے اتے ایندے نال معاشی سرگرمیاں کوں تکھے تے روزگار دے موقع پیدا کیتن اتے ایندے نال ݙو پاسے علاقائی تجارت اچ مزید ودھارا تھیسی۔ انہاں آکھیے جو سال 2021 ء ھک خاص موقع اے کیوں جو اے پاکستان اتے چین وچال سفارتی تعلقات دے قیام دی70 ویں سالگرہ دا سال اے جیں کوں ݙوہیں فریق بھرپورانداز اچ منیسن ۔ وزیر اعظم ایں موقع تے چینی وزیر اعظم کوں مبارخ ݙتی ۔وزیر اعظم عمران خان کووڈ۔ 19 نال نبݨݨ اچ پاک چین تعاون تے روشنی پیندے ہوئیں کورونا ویکسین دی فراہمی اچ چین دی پاکستان کوں جاری معاونت تے دلوں تعریف کیتی ۔ انہاں پاکستان اچ ویکسین تیار کرݨ دی سہولت دے قیام کیتے نیشنل انسٹی ٹیوٹ آف ہیلتھ (این آئی ایچ) کوں مدد فراہم کرݨ تے چین دا شکریہ ادا کیتے جیڑھی جو کووڈ۔ 19 دے مقابلہ کرݨ کیتے پاکستان دیاں کوششاں کوں مزید مستحکم کریسی ۔وزیر اعظم ݙوہیں ملکاں وچال اسٹریٹجک تعاون کوں مزید متنوع اتے گہرا کرݨ کیتے اعلی سطح دے تبادلے دی رفتار کوں جاری رکھݨ دی ضرورت تے وی زور ݙتا ۔ݙوہیں رہنماواں پاک چین ݙوطرفہ تعلقات کوں مزید مستحکم کرݨ دے عزم دا اعادہ کیتے۔
