اسلام آباد۔26اگست (اے پی پی) وزیر دفاع و دفاعی پیداوار خواجہ محمد آصف نال چین دی پیپلز لبریشن آرمی (پی ایل اے) دے گراؤنڈ فورسز دے کمانڈر جنرل لی کیاومنگ ملاقات کیتی جیں اچ سانجھی دلچسپی دے امور تے ڳالھ مہاڑ کیتی ڳئی ۔ وزیر دفاع معزز مہمان دا خیرمقدم کیتا تے آکھیے چین نال دوستی پاکستان دی خارجہ پالیسی دا سنگ بنیاد اے جیں دی بنیاد علاقائی اتے عالمی مسئلیں تے ہم آہنگی اے۔وفاقی وزیر سارے شعبیں اچ پاک چین تعلقات دی طویل تاریخ دی تعریف کیتی۔ انھاں آکھیے اے تعلقات ݙوہیں ملکاں دے عوام دی فلاح و بہبود تے مرکوز ہن اتے کہیں ݙوجھے ملک دے خلاف کائنی ۔ انہاں مزید آکھیے پاکستان چین نال تعلقات کوں اہمیت ݙیندے ۔وزیر موجودہ ݙوطرفہ میکانزم جیویں اسٹریٹجک ڈائیلاگ، قونصلر مشاورت اتے انسداد دہشت گردی متعلق مشاورت دی تعریف کیتی۔ ݙوہیں ہمسایہ ملکاں وچال اسٹریٹجک تعلقات سانجھے اعتماد تے قائم ہن ۔ انھاں نشاندہی کیتی جو پاکستان علاقائی تے عالمی فورمز تے دہشت گردی دے خلاف جنگ اچ چین دی سفارتی اتے مادی حمایت دی تعریف کریندے ۔خواجہ محمد آصف آکھیے پاک چین سیکیورٹی تعاون علاقائی استحکام دا ستون اے۔سی پیک دے ودھدے خطرات/آمد دے درمیان سیکورٹی/انٹیلی جنس شیئرنگ اچ تعاون اچ ودھارا تھئے ، انھاں ایں ڳالھ دا اعادہ کیتے جو پاکستان افغانستان نال آپݨے تعلقات تے خصوصی توجہ ݙیندے خطے اچ استحکام تے امن سانڳے پرعزم اے۔ پرامن افغانستان پاکستان اتے پورے خطے دے مفاد وچ اے ۔معزز مہمان علاقائی امن و استحکام کوں ودھارا ݙیوݨ اچ پاکستان دیاں کوششاں دے نال نال دہشت گردی دے خلاف جنگ اچ پاکستان دی مسلح فوج دے کردار دی تعریف کیتی
