اسلام آباد – 25 – مئي (اي پي پي) اطلاعات ۽ نشريات واري وفاقي وزير مريم اورنگزيب چيو اهي ته 20 لک ماڻهن جو اعلان ڪرڻ وارو اڄ فيس سيونگ ڳولي رهيو آهي، هڪ طرف وزيراعظم شهباز شريف ملڪ جي تعمير ۽ ترقي جو سفر جاري رکيو آهي ۽ ٻئي طرف فتنو ۽ فساد پکيڙيندڙ اڄ به رستن تي آهي، وزيراعظم انهن نالائقن، نااهلن ۽ ڪرپٽ ٽولي جي مچايل تباهي کي ٺيڪ ڪرڻ جي ڪوشش ڪري رهيو آهي. پريس ڪانفرنس کي خطاب ڪندي اطلاعات واري وفاقي وزير چيو ته عمران خان 2014ع ۾ به پارليامينٽ ۽ پي ٽي وي تي حملو ڪيو، سول نافرماني جي تحريڪ هلائي، بل ساڙيا، ان وقت جي وزيراعظم جي خلاف نعرا هنيا، سپريم ڪورٽ جي ٻاهران گندا ڪپڙا ٽنگيا ۽ اهي سمورا منظر پاڪستان جي عوام ڏٺا. اڄ هڪ ڀيرو ٻيهر ان جٿي خوني مارچ جو اعلان ڪيو ۽ انتشار ۽ فساد پکيڙڻ جي ڪوشش ڪئي. هن عوام کي مبارڪباد ڏيندي چيو ته عوام اڄ فساد ۽ انتشار پکيڙڻ جي سياست کي رد ڪري ڇڏيو آهي. اڄ سياست مان لشڪرڪشي جو خاتمو ٿي چڪو آهي، هاڻي ڪو به جٿو ٺاهي پارليامينٽ ۽ رياست تي حملو نه ٿو ڪري سگهي. هن چيو ته پنهنجي ضد، تڪبر، فساد، انتشار ۽ فتنو پکيڙڻ جي سوچ سان پوري پاڪستان کي يرغمال بڻائڻ جي خواهش رکندر شخص جي سياست کي پاڪستان جي عوام اڄ رد ڪري ڇڏيو آهي. اطلاعات واري وفاقي وزير چيو ته 2014ع ۾ جڏهن چين جو صدر پاڪستان جو دورو ڪري رهيو هو ۽ سي پيڪ جو منصوبو اچي رهيو هو، ان وقت جي وزيراعظم ملڪ کي ترقي، مهانگائي ۾ گهٽتائي، لوڊشيڊنگ جي خاتمي لاءِ ڏينهن رات ڪم ڪري رهيو هو ته هي شخص ان وقت به ڪنٽينر تي هو ۽ رياستي ادارن تي حملا ڪري رهيو هو. هي شخص گاريون ڏيندو رهيو ۽ ان وقت جو وزيراعظم ملڪ جي تعمير ۽ ترقي جي لاءِ ڪم ڪندو رهيو. ان شخص 126 ڏينهن هتي فساد پکيڙيو ۽ آخرڪار خالي هٿ ويو. اطلاعات واري وفاقي وزير چيو ته اڄ ملڪ جي اندر تعمير ۽ تخريب جا به ڪردار آهن، هڪ ڪردار خوني مارچ، هٿياربند ماڻهن سان گڏ فتنو ۽ فساد مچائڻ جي لاءِ اڄ به ڪنٽينر تي بيٺل آهي، هي اهو ئي شخص آهي جيڪو چار سال وزيراعظم جي ڪرسي تي مڙهيل رهيو، عوام کي بيروزگار ڪيو، انهن کان ماني ڳڀو کسيو، لوڊشيڊنگ جي عذاب ۾ مبتلا ڪيو، قرضن کي 43 هزار ارب رپين تائين پهچايو ۽ مهانگائي کي 16 سيڪڙو تائين پهچايو، چار سال هن شخص ڪوڙا الزام هنيا ۽ ثابت نه ڪري سگهيو، چار سالن کانپوءِ هي شخص هڪ ڀيرو ٻيهر ڪنٽينر تي بيهي فتنو ۽ فساد پکيڙي رهيو آهي. هن چيو ته ٻئي طرف وزيراعظم شهباز شريف اڄ چار سالن کانپوءِ بند منصوبي ڪروٽ ڊيم کي بحال ڪيو، اهو سي پيڪ جو منصوبو هو، هڪ طرف تعمير جي تصوير آهي ۽ ٻئي طرف فساد ۽ فتني جي. وزيراعظم شهباز شريف ڏينهن رات محنت ڪري عوام کي ريليف ڏيڻ جي لاءِ ڪم ڪري رهيو آهي، انهن نالائقن، نااهلن ۽ ڪرپٽ ٽولي جي مچايل تباهي کي ٺيڪ ڪرڻ جي ڪوشش ڪري رهيو آهي، ٻئي طرف هي تخريبڪار ۽ فساد فتنو هڪ ڀيرو ٻيهر ڪنٽينر تي آهي، هي چار سال وزيراعظم جي ڪرسيءَ تي مڙهيل رهيو ۽ هاڻي ڪهڙي شيءَ تي احتجاج ڪري رهيو آهي؟ هن چيو ته اڄ عوام ڏٺو ته ان ٽولي پوليس اهلڪار کي شهيد ڪيو، ان جي آفيس هولڊرز ۽ ٽڪيٽ هولڊرز جي گهرن مان هٿيار نڪتا، عوام کي رستن تي گهرائي پاڻ هيلي ڪاپٽر ۾ ويٺل رهيو، اڄ به سندس زبان مان رڳو گار، ڌمڪي، فساد ۽ فتنو مچائڻ جي ڪوشش ڪئي پئي وڃي. هن چيو ته پاڪستان جي عوام اڄ اعلان ڪري ڇڏيو آهي ته ان کي ملڪ جي تعمير ۽ ترقي گهرجي، اڄ نوجوانن اعلان ڪري ڇڏيو آهي ته اسان کي تعمير ۽ ترقي، روزگار، معاشي بحالي، مهانگائي ۽ لوڊشيڊنگ جو خاتمو گهرجي. اطلاعات واري وفاقي وزير چيو ته اڄ ملڪ ان فتني ۽ فسادي ٽولي جي ڪري معاشي بدحالي جو شڪار آهي، عوام اهڙي سياست جنهن ۾ گار، فتنو ۽ فساد هجي، ان کي رد ڪري ڇڏيو آهي جنهن تي پاڪستان جي عوام کي مبارڪباد ڏيان ٿي. هن چيو ته ان ٽولي کي پارليامينٽ مان بي اعتمادي رٿ ذريعي ڪڍيو، اڄ عوام جو جواب به انهن کي ملي ويو آهي، 20 لک ماڻهن جو اعلان ڪرڻ وارو اڄ فيس سيونگ ڳولي رهيو آهي، جڏهن باس هيلي ڪاپٽر تي ويهي مارچ جي قيادت ڪندو ته پوءِ اها صورتحال ته ٿيندي. هن چيو ته اڄ ملڪ ۾ تعمير ۽ ترقي، نوجوانن کي روزگار جي فراهمي ۽ ملڪ جي اندر معاشي بحالي جو سفر شروع ٿي چڪو آهي، عمران خان کي هاڻي سمجهڻو پوندو ته ملڪ جي 22 ڪروڙ عوام پاڪستان جي ترقي چاهي ٿي، عوام اها سياست چاهي ٿو جيڪا ڪارڪردگي ۽ تعمير تي ٻڌل هجي، جنهن سان پاڪستان جي عزت ٿئي. اطلاعات واري وفاقي وزير ميڊيا جا به ٿورا مڃيندي چيو ته ميڊيا اصل حقيقتون پاڪستان جي عوام کي ڏيکاريون. هن عوام کي دعوت ڏني ته اها 28 مئي تي تڪبير ڏهاڙو ملهائڻ جي لاءِ اچي، 28 مئي پاڪستان جي قومي سلامتي کي فتح نه ٿيڻ جو بڻائڻ جو ڏينهن آهي، سمورين ڌمڪين ۽ دٻاءُ جي باوجود نواز شريف ائٽمي ڌماڪا ڪري ڀارت کي پيغام ڏنو هو ته هاڻي پاڪستان ڪنهن به قسم جو ڪمپرومائيز نه ڪندو، ايبسليوٽلي ناٽ اهو هوندو آهي. هن چيو ته عوام پاڪستان جي گولڊن جوبلي تقريبن ۾ شرڪت ڪري، اڄ کانپوءِ پاڪستان ۾ رڳو خوشحالي ۽ ترقي جي سفر کي ملهايو ويندو. هن چيو ته اڄ پاڪستان ۾ اهي سمورا منصوبا بحال ٿي رهيا آهن جيڪي هن فسادي ٽولي جي نالائقي ۽ چوري جي ڪري بند ٿي ويا هئا. اطلاعات واري وفاقي وزير ڪشميري اڳواڻ ياسين ملڪ جي سزا جي مذمت ڪندي چيو ته ياسين ملڪ کي فري ٽرائل تائين پهچ نه ڏني وئي. ڪشمير جي ان بهادر پٽ اڪيلي سر آزادي جي جنگ جي ترجماني ڪئي، اڄ ڀارت جي عدالت کان ڪجهه سوال ڪيا جنهن تي ڪو جواب نه آيو. هن چيو ته ڀارت بنيادي انساني حقن ۽ اظهار راءِ جي آزادي جي خلاف ورزيون ڪري رهيو آهي، ڀارت جي 75 سالن کان جاري ظلم ۽ ڏاڍ کي رد ڪريون ٿا، اسان ان سزا کي به رد ڪريون ٿا، ان ظلم جي خلاف آواز بلند ڪندا رهنداسين. هن چيو ته وزيراعظم ڪشمير معاملن واري وزارت، قانون واري وزارت ۽ انساني حقن واري وزارت کي هدايت ڪئي هئي ته ياسين ملڪ جي مسئلي تي آواز اٿاريو وڃي، اهڙي طرح جا فيصلا ياسين ملڪ ۽ ڪشميري عوام جي حوصلن کي ڪمزور نه ٿا ڪري سگهن. هن يچو ته ڀارت هڪ شخص جي ڳالهائڻ کان ڊنل آهي، جيڪڏهن ان کي ڊپ نه آهي ته ياسين ملڪ کي ڳالهائڻ ڏنو وڃي. هڪ سوال جي جواب ۾ اطلاعات واري وفاقي وزير چيو ته پي ٽي آءِ سان ڪنهن به قسم جو ڪو معاهدو طئي ناهي ٿيو، سپريم ڪورٽ جي فيصلي کانپوءِ حڪومت ڳالهين واري ٽيم ٺاهي آهي، جيئن ئي ڪو معاهدو يا ڳالهيون ٿينديون ته ان جا تفصيل پاڪستان جي عوام آڏو رکيا ويندا. هن چيو ته جلسي جي لاءِ جيڪا جڳهه مقرر ٿي عمران خان اتي اچي ۽ تقرير ڪري گهر هليو وڃي ۽ تخريبڪاري بدران ملڪ جي تعمير ۽ ترقي ۾ پنهنجو حصو وجهي. هڪ سوال جي جواب ۾ هن چيو ته خوني ۽ فسادي مارچ جو اعلان ٿيندو ته ان جي اجازت نه هوندي، فسادي مارچ، لشڪرڪشي ۽ هٿياربند جٿا ڪنهن به قسم جي جمهوريت نه آهي. عوام جي حفاظت حڪومت جي ذميواري آهي جنهن کي اڄ نڀايو ويو آهي. انهن سمورين شين جي اجازت هوندي جيڪي پرامن هونديون، ڳالهيون به ان روح تي ٿينديون. هن چيو ته پي ٽي آءِ جو ماضي تمام خطرناڪ آهي، هن پي ٽي وي تي حملو ڪيو، پارليامينٽ تي حملو ڪيو، سول نافرماني ڪئي، پوليس وارن جا مٿا ڦاڙيا، انهن کان هٿيار مليا، انهن ماڻهن ۾ ڏنڊا ورهايا، انهن ئي ماڻهن خوني مارچ جو اعلان ڪيو، اهي سموريون شيون پرامن احتجاج جي زمري ۾ نه ٿيون اچن. هن چيو ته عوام جي تڪليف تي زيرو ٽالرنس آهي، اڄ به ٻارن جا ساليانا پيپر ملتوي ٿيا، مريض اسپتال نه پهچي سگهيا. لاهور ۾ انهن ٽائر ساڙي ٽريفڪ جام ڪئي پر ڪجهه لمحن کانپوءِ لاهور پرامن ٿي ويو، ماڻهو گهرن جي بيسمينٽ ۾ لڪي ڪال ڏيندا ۽ هيليڪاپٽر ۾ ويهي مارچ جي قيادت ڪندا ته اها صورتحال ته پيدا ٿيندي. هن چيو ته عوام انهن جي اصليت ڄاڻي چڪي آهي، پاڪستان جي عوام ملڪ جي ترقي چاهي ٿي تخريبڪاري نه. هڪ سوال جي جواب ۾ اطلاعات واري وفاقي وزير چيو ته ڳالهين ۽ معاهدي جي پٽيشن عمران خان سپريم ڪورٽ کڻي ويو، سپريم ڪورٽ جي فيصلي جي خلاف ورزي ٿي ته اها توهين عدالت هوندي. هن چيو ته پي ٽي آءِ جا ماڻهو ڪنهن معاهدي کي پورو ڪرڻ نه ٿا ڄاڻين، نه ئي انهن کي خبر آهي ته وفا ڇا هوندي آهي. هن چيو ته عمران خان احسان فراموش شخص آهي ان تي ڪنهن کي يقين نه آهي. هن چيو ته سپريم ڪورٽ جي فيصلي تي عملدرآمد جو عمران خان به پابند آهي. اطلاعات واري وفاقي وزير چيو ته هن وقت هٿياربند ماڻهن ڊي چوڪ کي ميدان جنگ بڻائي ڇڏيو آهي، اها سپريم ڪورٽ جي فيصلي کانپوءِ جي سرگرمي آهي، جيڪا عمران خان جي حڪمت ٿي رهي آهي. هن چيو ته خدا نه ڪري ڪنهن قسم جو جاني يا مالي نقصان ٿيو ته ان جي ذميواري عمران خان تي هوندي. هن چيو ته هڪ طرف حڪومت جي ٽيم ڳالهين جي تياري ڪري رهي آهي ۽ ٻئي طرف هي جٿو ڊي چوڪ تي هنگامي آرائي ڪري رهيو آهي. هڪ سوال تي اطلاعات واري وفاقي وزير چيو ته ملڪ ۾ معاشي بحالي جو سفر شروع ٿي چڪو آهي، گذريل چئن سالن دوران جن ملڪن سان لاڳاپا خراب ڪيا ويا، انهن سان لاڳاپا بحال ٿيڻ شروع ٿي چڪا آهن. هن چيو ته عمران خان کي انهي ڳالهه جو خوف آهي ته ڪٿي پاڪستان جي عوام کي ريليف نه ملي وڃي. هن چيو ته موجوده حڪومت جو مقصد عوام کي رڳو خوشخبري ۽ خوشحالي ڏيڻ آهي. اسان عمران خان وانگر ڪشڪول ناهي کنيو ۽ نه ڪنهن جي اڳيان هٿ ڦهلايو، اسان اسٽريٽجڪ پارٽنرشپس ڪئي آهي، منصوبن ذريعي فنڊنگ پاڪستان ايندي. هن چيو ته سي پيڪ جو منصوبو ڪشڪول نه هو، اهو ملڪي ترقي جي لاءِ معاشي منصوبو هو، جنهن نوجوانن کي روزگار ڏنو، عوام کي ريليف ڏنو. هن چيو ته جڏهن ملڪ ۾ تعمير ۽ ترقي جو ويزن هجي ته پوءِ ڪشڪول ناهي هوندو، ترقي ٿيندي آهي، روزگار هوندو آهي ۽ وزيراعظم شهباز شريف انهي ويزن سان ڏينهن رات ڪم ڪري رهيو آهي.
