لاهور – 12 – آگسٽ (اي پي پي) خاتون اول ثمينه عارف علوي چيو آهي ته معاشري جي سڀني طبقن کي معذور ماڻهن کي قومي ڌارا ۾ شامل ڪرڻ جي لاءِ گڏجي ڪم ڪرڻو پوندو. اها ڳالهه هن معذورن جي بحالي واري اداري جي دوري جي موقعي تي چئي. اداري جي سربراهه ايگزيڪيوٽو ڪميٽي جي ميمبرن ۽ هاءِ اسڪول جي شاگردن خاتون اول جي آجيان ڪئي. صدر جي گهرواريءَ ثمينه عارف علوي پي ايس آر ڊي هاءِ اسڪول، آرٿوپيڊڪ اسپتال، او پي ڊي سميت ٻين ڊپارٽمينٽس جو دورو ڪيو. هن معذور ماڻهن جي بحالي ۾ اداري جي خدمتن کي ساراهيو. هن چيو ته هي ادارو 1957ع کان خصوصي ماڻهن جي ڀلائي لاءِ ڪم ڪري رهيو آهي. ان مشن جي شروعات هڪ ڪمري ۾ ٿي هئي پر هاڻي هي جسماني عضون ۽ مسئلن جي حل لاءِ سڀ کان جامع ادارو بڻجي اڀريو آهي. بيگم ثمينه علوي چيو ته معاشري جي سمورن طبقن کي گڏجي معذور ماڻهن کي قومي ڌارا ۾ شامل ڪرڻ جي لاءِ ڪم ڪرڻو پوندو ته جيئن اهي پنهنجي صلاحيتن کي استعمال ۾ آڻي ملڪي ترقي ۾ ڪردار ادا ڪري سگهن.
