صحبت پور ۔4جنوری (اے پی پی) وزیراعظم محمد شہبا ز شریف توقع کیتی جو 9 جنوری 2023 کوں جنیوا اچ تھیوݨ آلی “انٹرنیشنل کانفرنس آن کلائمیٹ ریزیلیئنٹ پاکستان ” اچ مہذب معاشرے چھل متاثرین دی بحالی اتے تعمیر نو اچ بھرپور مدد کیتے اڳوں امسن۔ بلوچستان اچ جدید سہولتاں دے 12 دانش سکول قائم کریسوں۔ چھل متاثرین کوں گھراں دے معاوضے دی ادائیگی کیتے سارے وسائل لاتے ویسن۔ بدھ کوں صحبت پور اچ چھل متاثرین اتے مقامی عمائدین نال خطاب کریندیں ہوئیں آکھی۔ وزیراعظم آکھیا جو اڄ اساݙے کیتے خوشی دا ݙینھ اے۔ ماضی اچ جڈاں اتھاں دا دورہ کیتا تاں اے علاقہ پاݨی اچ ٻݙیا ہئی اتھاں امدادی سامان پڄاوݨ کوئی سوکھا کم کائنا ہئی۔ صوبائی حکومتاں دی مشینری ݙینھ رات کم کریندی پی اے۔ وزیراعظم آکھیا جو تیل تے پاکستان دے 27 ارب ڈالرخرچ تھین جیڑھا جو تاریخ اچ تیل تے تھیوݨ آلا ساریاں توں وݙا خرچہ ہئی۔ انہاں آکھیا جو ایں اچ کوئی شک کائنی جو مہانگ ودھ ڳی اے، انہاں سارے مسئلیاں دے نال نال چھل دی صورت اچ ہک ٻیا وݙا چیلنج سامھے آئے پر اللہ دا شکر اے جو مخلوط حکومت چھل متاثرین دی اپݨی بساط توں ودھ خدمت کیتی اے۔ وفاقی حکومت بینظیر انکم سپورٹ پروگرام نال 100 ارب روپے توں ودھ متاثرین کیتے مختص کیتا۔ 9 جنوری کوں انٹرنیشنل کانفرنس تھیندی پی اے جئیں اچ اقوام متحدہ دے سربراہ دے علاوہ نمائندے وی شریک تھیسن۔ ایں کانفرنس دی صدارت او آپ کریسن جݙانجو ایں بارے مختلف ملکاں دے سربراہان رابطیاں دا سلسلہ جاری اے جو ایں کانفرنس اچ شریک تھیون تانجو دنیا کوں شہ ملے۔ انہاں آکھیا جو دانش سکول جیڑھا اتھ بݨیے اونکوں ݙیکھ تے ٻہوں خوشی تھی اے۔ قائم مقام گورنر اتے وزیراعلیٰ بلوچستان اتے انتظامیہ ایں اچ بھرپور دلچسپی ڳھدی اے۔ ایں موقع تے وزیراعظم رحیم یار خان دے دانش سکول اچ ماء تے پیو ݙوہیں دے سائے توں محروم پڑھݨ آلی بالڑی عائشہ دی داستان سݨدیں ہوئیں آبدیدہ تھی ڳے۔ وزیراعظم ایں موقع تے بلوچستان اچ 12 سکول ٻݨاوݨ دا اعلان کیتا جیڑھا جو پنجاب اچ ٻݨائے ڳے دانش سکولاں دی طرز تے ہوسن۔ ایں موقع تے قائم مقام گورنر جان محمد جمالی اپݨے علاقے اچ دانش سکول دے قیام کیتے مفت زمین ݙیوݨ دا اعلان کیتا۔ وزیراعظم کوں چھل متاثرین دی بحالی اتے تباہ تھیے انفراسٹرکچر دی تعمیرنو اتے بحالی بارے بریفنگ ݙتی ڳی۔
