اسلام آباد۔23فروری (اے پی پی) وفاقی سیکرٹری اطلاعات تے نشریات شاہیرہ شاہد آکھیا جو تریمتیں انٹر پرینیورز دا ملکی معاشی ترقی اچ اہم کردار اے، تریمتیں انٹر پرینیورز دی ترقی پہلی ترجیح اے۔ تریمتیں کوں معاشی طور بااختیار ٻݨاوݨ کیتے وزارت تجارت ،ٹریڈ ڈویلپمنٹ اتھارٹی ،اسلام آباد ویمن چیمبر آف کامرس دے نال نال اسلام آباد چیمبر آف کامرس کوششاں قابل تعریف ہن۔ تریمتیں ملک دی آبادی دا 51 فیصد ہن جیڑھی ملکی معاشی ترقی اچ جواناں نال کردار ادا کریندیاں پن۔ اے ڳالھیں انہاں خمیس کوں اسلام آباد چیمبر آف کامرس اچ تریمتیں انٹرپرنیورز دی حوصلہ افزائی کیتے ” ہر ہنر ” نمائش دی پری لانچنگ تقریب اتے نمائش دے آفیشل لوگو دی تقریب رونمائی نال بطور مزمان خصوصی خطاب کریندیں ہوئیں آکھی۔ وفاقی سیکرٹری اطلاعات و نشریات شاہیرہ شاہد تریمتیں انٹرپرینیورز دی حوصلہ افزائی کیتے ٹریڈ ڈویلپمنٹ اتھارٹی آف پاکستان دی اقدامات دی تعریف کیتی اتے یقین ݙوایا جو وزارت اطلاعات و نشریات ایں ایونٹ کوں کامیاب ٻݨاوݨ اچ تعاون کریسی۔ انہاں آکھیا جو تریمتیں کیتے ہک انڄ پلیٹ فارم دے طور ٹی ڈیپ ہک چنڳی کوشش کیتی اےجئیں نال پرے دے علاقیاں دی تریمتیں ایں نمائش کیتی امدی پن۔ تقریب توں ٹریڈ ڈویلپمنٹ اتھارٹی آف پاکستان دے ڈائریکٹر جنرل محمد نصیر خطاب کریندیں ہوئیں آکھیا جو تریمتیں انٹرپرینیورز کوں گلوبل سطح تے متعارف کراوݨ دی کوششاں جاری ہن اتے ٹی ڈیپ کاروباری تریمتیں دی ترقی اتے انہاں دے فروغ کیتے کم کریندا پے۔ ایں موقع تے ٹریڈ ڈویلپمنٹ اتھارٹی آف پاکستان دی اسسٹنٹ ڈائریکٹر مریم ممتاز ”ہر ہنر ” نمائش دے خدو خال بارے پریذینٹیشن ݙتی اتے ݙسیا جو تریمتیں انٹرپرینیورز دی حوصلہ افزائی کیتے نمائش 4توں 5مارچ پاک چائنا فرینڈشپ سنٹر اسلام آباد اچ تھیسی جئیں اچ پورے ملک توں خصوصی طور شمالی علاقیاں دی تریمتیں انٹرپرینیورز اپݨی مصنوعات دی نمائش کریسن۔ تقریب توں اسلام آباد ویمن چیمبر آف کامرس اینڈ انڈسٹری دی صدر رضوانہ چوہدری ،آئی ٹی ایکسپرٹ سدرہ چیمہ اتے ماہ نور فاطمہ وی خطاب کیتا۔ تقریب دے چھیکڑ تے اسلام آباد چیمبر آف کامرس اینڈ انڈسٹری دے صدر احسن ظفر بختاوری وفاقی سیکرٹری اطلاعات و نشریات شاہیرہ شاہد اتے ٹریڈ ڈویلپمنٹ اتھارٹی آف پاکستان دے ڈائریکٹر جنرل محمد نصیر کوں سووینیئر پیش کیتا۔
