راولپنڈی ۔27اکتوبر (اے پی پی) پاک فوج دے شعبہ تعلقات عامہ (آئی ایس پی آر) دے سربراہ لیفٹیننٹ جنرل بابر افتخار آکھیا جو ارشد شریف دی موت تے کوڑا بیانیہ ٻݨا تے لوکاں کوں گمراہ کرݨ اتے اداریاں کوں بدنام کرݨ دی کوشش کیتی ڳی اے، شفاف تحقیقات نال سائفر اتے ارشد شریف دی موت نال جڑیے حقائق دے منڈھ تئیں پڄݨ ٻہوں ضروری اے۔ ارشد شریف ملک چھوڑ تے نہ ونجݨ چاہندے ہن، انہاں کوں مجبور کیتا ڳیا جو ملک چھوڑ ݙیون۔ ایں معاملے دی شفاف تحقیقات تھیوݨی چاہیدی اے۔ سائفر دی من ڳھڑت کہانی دا حقیقت نال کوئی تعلق کائنا ہئی۔ قوم اتے فوج وچال خلیج پیدا کرݨ دی کوشش کیتی ڳی۔ اساں آئین دے مطابق آپݨا کردار ادا کریندے پیوں۔ غدار اتے سازشی نی تھی سڳدے۔ آئین اداریاں دی کردار کشی اتے انہاں دے خلاف ڳالھ کرݨ دی موکل نی ݙیندا۔ لانگ مارچ جمہوری حق اے۔ کہیں کوں ملک اچ عدم استحکام پیدا کرݨ دی موکل کائنا ݙیسوں۔ خمیس کوں ڈی جی آئی ایس آئی لیفٹینٹ جنرل ندیم احمد انجم رلے نیوز کانفرنس توں خطاب کریندیں ہوئیں انہاں آکھیا جو اڄ دنیا اچ رہوݨ آلے کشمیری یوم سیاہ منیندے پن۔ انہاں آکھیا جو پاکستان قوم کل وی کشمیری بھراواں نال کھڑی ہئی اتے اڄ وی کھڑی اے اتے ہمیشہ رہسی۔ انہاں آکھیا جو اے کانفرنس صحافی ارشد شریف دی موت اتے اوندے عوام دا احاطہ کرݨ کیتے کیتی ڳی اے۔ ارشد شریف دی موت بارے ہک کوڑا بیانیہ ٻݨایا ڳیا اتے لوکاں کوں گمراہ اتے اداریاں کوں بدنام کرݨ دی کوشش کیتی ڳی۔ ارشد شریف دی موت دا اساں ساریاں کوں ݙکھ اے۔ صحافی ارشد شریف دے ٹٻر نال کھڑوں۔ ارشد شریف محنتی صحافی ہن۔ سائفر دی گھڑی ڳی کہانی دا حقیقت توں کوئی تعلق کائنی۔ نیشنل سکیورٹی کمیٹی کوں آکھیا ڳیا جو سائفر سفیر دی ذاتی رائے اے۔ ارشد شریف سائفر تے وی کئی پروگرام کیتے۔ سائفر تے آئی ایس آئی دی تحقیقات کوں عوام دے سامھے ڳھن آوݨ چاہندے ہن۔ سائفر بارے سفیر دی رائے کوں آپݨے سیاسی مقصد کیتے استعمال کیتا ڳیا اتے قوم اتے فوج وچال خلیج پیدا کرݨ دی کوشش کیتی ڳی۔ نجی ٹی وی چینل اے آر وائی دے ذریعے فوج دے خلاف مخصوص بیانیئے کوں پروان چڑھایا ڳیا۔ گمراہ کن پروپیگنڈے دے باوجود پاک فوج تحمل کیتا۔ اوں ویلھے وی اساں آکھیا جو سیاتدان آپت اچ ٻہہ تے مسئلے حل کرن۔ فوج دے خلاف سخت تنقید دے باوجود وی ارشد شریف بارے اساݙے دل اچ کوئی منفی خیال کائنا ہئی۔ ہک تھیرٹ الرٹ کوں سامھے آن تے ارشد شریف کوں مجبور کیتا ڳیا جو او ملک چھوڑ ݙیون۔ سلمان اقبال آپݨے پروڈیوسر کوں ہدایت کیتی جو جلدی توں جلدی ارشد شریف کوں ملک توں ٻاہر بھیج ݙیون۔ ارشد شریف ملک چھوڑ تے نہ ونجݨ چاہندے ہن۔ ارشد شریف دی کراچی توں سیٹ بُک ہئی پر او پشاور توں ڳے۔ ارشد شریف دبئی توں کینیا اوں ویلھے روانہ تھیے جئیں ویلھے انہاں دے ویزے دی معیاد مُک ڳئی۔ اساݙی اطلاع دے مطابق کہیں وی سرکاری افسر ارشد شریف کوں دبئی چھوڑم تے مجبور نی کیتا۔ انہاں آکھیا جو ارشد شریف دی موت دی شفاف تحقیقات تھیوݨی چاہیدی اے اتے ارشد شریف دی موت توں کون فائدہ چیندا پئے۔ اساں ساریاں کوں انکوائری کمیشن دی رپورٹ دا انتظار کرݨا چاہیدے۔ ڈی جی آئی ایس پی آر آکھیا جو ہک متحدہ قوم چیلنجز دا مقابلہ کر سڳدی اے۔ انہاں نشابر کیتا جو تحقیقاتی کمیٹی توں آئی ایس آئی دے ممبر کوں ڄاݨ تے کݙھیا ڳے تانجو شک نہ رہوے۔ تنقید ہر ہک دا حق اے۔ اداریاں دے دفاع حکومت کریندی اے۔ نویں آرمی چیف دی تعیناتی ویلھے تے تھیسی۔ ایں موقع تے ڈی جی آئی ایس آئی لیفٹیننٹ جنرل ندیم احمدانجم آکھیا جو ارشد شریف دا کیس آپݨے چھیکڑی انجام تئیں نہ پڄیا تاں اوندا ٻہوں نقصان تھیسی۔ میݙی اطلاع دے مطابق ارشد شریف دی حیاتی کوں پاکستان اچ کوئی خطرہ نہ ہئی۔ ارشد شریف دے میݙے ماتحے افسراں نال چنڳے تعلقات ہن۔ انہاں آکھیا جو کینیا دے آپݨے ہم منصب نال رابطے اچ ہم۔ میݙے منصب اتے میݙے کم دی نوعیت ایہو سویں اے جو میکوں پچھوں رہوݨا پوندے پر میݙے ادارے کوں بغیر جواز دے تنقید کیتی ویندی پی اے تاں چُپ نی رہہ سڳدا۔ جتھ لوڑھ پی سچ عوام دے سامھے رکھیساں۔ ایں مٹی کیتے اساݙے ٻہوں نینگر شہید تھین اوندا وی مذاق اݙایا ڳیا۔ میں آپݨٰی ذات کیتے نی ملک تے قوم کیتے عوام دے سامھے آیاں۔ مارچ اچ میݙی ذات دے خلاف غلیظ مہم چلائی ڳی۔ ملک دے فیدے کیتے اساں ادارے اتے خود کوں سیاست توں ٻاہر کر ڳھنو۔ انہاں آکھیا جو مارچ اچ آرمی چیف کوں انہاں دی مدت ملازمت اچ غیر معینہ مدت تئیں توسیع دی پیش کش کیتی ڳی۔ آرمی چیف مدت ملازمت اچ توسیع دی پیشکش رد کر ݙتی۔ میں پچھݨ چاہنداں جو اگر تساݙی نظر اچ تساݙا سپہ سالار میر جعفر اتے میر صادق اے تاں ماضی اچ انہاں دی تعریفاں دے پل کیوں بدھیے ویندے ہن؟ آرمی چیف اگر غدار ہن تاں انہاں کوں توسیع کیوں ݙتی ڳی۔ انہاں نشابر کیتا جو صدرمملکت نال ملاقاتاں دا مقصد ملک اچ استحکام ڳھن آوݨ ہئی۔
.jpg)
.jpg)
.jpg)
.jpg)
