اسلام آباد – 27 – اپريل (اي پي پي) اطلاعات ۽ نشريات واري وفاقي وزير مريم اورنگزيب چيو آهي ته عمران خان سازش جو ڪاغذ ان لاءِ لهرائي رهيو آهي ته سندس چار سالن جي ڪارڪردگي جو صفحو خالي آهي، عمران خان ڪارڪردگي جو صحفو ڀريو ٻي صورت ۾ پاڪستان جي عوام اهڙي طرح ان جو بليڪ آئوٽ ڪندي جو پاڪستان جي تاريخ ۾ ڪڏهن ان جو نالو وٺڻ وارو ڪو به نه هوندو، عمران خان جي ڪوڙ واري سياست هاڻي نه هلندي، عمران خان شهباز شريف جي خدمت جي جذبي کان پاڻ ڊنل آهي، حڪومت بدلجي وئي پر عمران خان جي ڪيسٽ ناهي بدلي، چيف اليڪشن ڪمشنر کان استعيفا گهرندڙن کي ترقي جي شرح منفي ڪرڻ تي پاڻ مستعفي ٿيڻ گهرجي ها، گذريل حڪومت جي نااهلي جي ڪري بجلي جا ڪارخانا بند پيل هئا جنهن جي مرمت جو ڪم جاري آهي، وزيراعظم لوڊشيڊنگ نه ڪرڻ جون هدايتون جاري ڪيون آهن، وزيراعظم نيشنل ايڪشن پلان جو جائزو وٺڻ جي هدايت ڪئي آهي، اڳوڻي حڪومت صحافين کي جبر ۽ تشدد جو نشانو بڻايو. وفاقي ڪابينا جي اجلاس کانپوءِ ميڊيا کي بريفنگ ڏيندي اطلاعات ۽ نشريات واري وفاقي وزير چيو ته وزيراعظم جي صدارت ۾ ڪابينا جي اجلاس ۾ ڪراچي واقعي جي شديد مذمت ڪئي وئي، ڪابينا سيڪيورٽي جي صورتحال جو ٻيهر جائزو وٺڻ جو فيصلو ڪيو آهي. هن چيو ته مختلف منصوبن تي ڪم ڪندڙ چين جي شهرين جي سيڪيورٽي جو نئين سر جائزو ورتو ويندو، چيني شهرين جي فول پروف سيڪيورٽي کي يقيني بڻايو پيو وڃي.
وفاقي وزير چيو ته گهرو وزارت جي بريفنگ ۾ امن امان جي صورتحال جي مختلف رخن تي غور ڪيو ويو، هن چيو ته نيشنل ايڪشن پلان جو ٻيهر جائزو وٺڻ لاءِ وزيراعظم هدايتون جاري ڪري ڇڏيون آهن، وفاقي وزير ٻڌايو ته ڪراچي واقعي جي جاچ جو آغاز ٿي چڪو آهي، چيني سفارتخاني کي به ان ڳالهه جي خاطري ڪرائي وئي آهي ته اها جاچ جلد مڪمل ٿي ويندي، وزيراعظم نيڪٽا جو اجلاس فوري طور تي گهرائڻ ۽ نيشنل ايڪشن پلان جو جائزو وٺڻ جي هدايت ڪئي آهي. هن چيو ته وفاقي ڪابينا ۾ سول سرونٽ ڊائريڪٽري (سروس کان رٽائرمينٽ) سروس رول 22 جو جائزو ورتو ويو، ان سروس رولز کي بڻائڻ جو مقصد صرف ۽ صرف آفيسرن تي دٻاءُ وجهڻ هو، ڪابينا فيصلو ڪيو آهي ته اهڙا سمورا سروس رولز جيڪي اڳوڻي دور ۾ ڪنهن خاص مقصد لاءِ ٺاهيا پئي ويا انهن جو جائزو ورتو وڃي، ڪو به اهڙو قانون نه ٺهي جيڪو آفيسرن کي نشانو بڻائڻ جي لاءِ استعمال ڪيو وڃي، هن ٻڌايو ته سروس رولز تي نظرثاني لاءِ ڪابينا جي ڪميٽي جوڙي وئي آهي. قانون واري وفاقي وزير سينيٽر اعظم نذير تارڙ، موسمياتي تبديلي واري وزير شيري رحمان ۽ ريلوي واري وفاقي وزير خواجه سعد رفيق ان ڪميٽي ۾ شامل آهن. ڪميٽي ٻن هفتن جي اندر پنهنجي رپورٽ ڪابينا ۾ پيش ڪندي. هن چيو ته ڪابينا اي او بي آءِ جي چيئرمين شڪيل مڱڻيجو جون خدمتون اسٽيبلشمينٽ ڊويزن جي حوالي ڪرڻ جي منظوري ڏني. ڪابينا عاصم احمد کي ايف بي آر جي چيئرمين طور مقرر ڪرڻ جي منظوري ڏني، هن چيو ته گزريل چئن سالن ۾ دهشتگردي جي واقعن ۾ اضافو ٿيو، وزيراعظم گهرو وزارت کي هدايت ڪئي آهي ته هو نيشنل ايڪشن پلان جو سمورن صوبن سان گڏجي جائزو وٺي ۽ نيشنل ايڪشن پلان جي اندر سمورن اسٽيڪ هولڊرز کي شامل ڪري نيڪٽا جي ذريعي جامع پلان جوڙيو وڃي. هن ٻڌايو ته وزيراعظم شهباز شريف کي پاور ڊويزن ۽ پيٽروليم ڊويزن پاران بريفنگ ڏني وئي، هن چيو ته جنهن وقت اسان حڪومت سنڀالي ان وقت 27 بجلي جا ڪارخانا بند هئا، ساڍا پنج هزار ميگاواٽ بجلي جي پهچ نه ٿي رهي هئي، مجموعي طور تي 11 هزار ميگاواٽ بجلي پاڪستان جي عوام کي نه پهچائي پئي وڃي، ٻن هفتن جي اندر بند ڪارخانن جي مرمت ڪري کين بحال ڪيو، هن وقت 27 مان صرف 7 يونٽ رهجي ويا آهن جنهن جي مرمت جون هدايتون جاري ڪيون ويون آهن، اهي به جلد سسٽم ۾ بجلي جي پيداوار شروع ڪري ڇڏيندا. هن چيو ته 7 مئي کانپوءِ ٻارڻ جو مسئلو به حل ٿي ويندو، بجلي جي بند ڪارخانن جي مرمت جو ڪم جاري آهي، وزيراعظم جي هدايت آهي ته پهرين مئي کانپوءِ زيرو لوڊشيڊنگ گهرجي، هن چيو ته هن وقت سسٽم ۾ 18727 ميگاواٽ بجلي موجود آهي، 500 کان 2000 ميگاواٽ بجلي جو شارٽ فال آهي، پلانٽس جي مرمت ۽ فيول جي فراهمي کانپوءِ ان شارٽ فال تي به ضابطو آندو ويو آهي. مريم اورنگزيب چيو ته ڊيزل جي ذخيره اندوزي جي حوالي سان هدايتون جاري ڪري ڇڏيو آهن، اتنظامي طريقن سان ان جو خاتمو انتهائي ضروري آهي ته جيئن پاڪستان جي عوام خاص طور تي هارين کي ڊيزل جي فراهمي يقيني بڻائي سگهجي. هن چيوته هڪ شخص جيڪو 2014ع ۾ ڪنٽينر تي هو، 2018ع ۾ آر ٽي ايس کي ويهاري ملڪ ۾ مڙهيو ويو ۽ چار سال حڪومت ۾ رهيو ۽ هاڻي ٻيهر ڪنٽينر تي آهي ان جي تقرير جي ڪيسٽ نه بدلي، هن چيو ته چار سال حڪومت ۾ رهندي به هُن الزام لڳايا، مخالف ڌر کي موت جي سزا جي چڪين ۾ وڌو، جتي ڪرپشن جو ڪيس نه ٺهندو هو اتي هيروئن جو ڪيس ٺاهيو، نيب ۽ ايف آءِ اي کي استعمال ڪيو، سياسي مخالفن کي بدبوار احتساب جو نشانو بڻايو. هن چيو ته چار سالن کانپوءِ هڪ الزام به ثابت نه ٿيو، عدالتن کان اهي ماڻهو سرخرو ٿيا جنهن تي اهي صبح ۽ شام الزام لڳائيندا هئا، هن چيو ته اطلاعات واري وزارت اسان وٽ آهي، اسان توهان کي هڪ بهترين اسپيچ رائيٽر ڏيون ٿا جيڪو گهٽ ۾ گهٽ اهو ٻڌائي ته اڄ پاڪستان جي عوام مهانگائي، بيروزگاري، معاشي تباهي جا سوال پڇي رهي آهي، ان جي جواب ۾ تقرير لکي ڇو ته چار سال توهان اقتدار تي مڙهيل رهيا ۽ اڄ الزام لڳائي رهيا آهيو ته انهن جو پئسو ٻاهر ڇو آهي، توهان اهو پئسو پاڪستان واپس ڇو نه آندو؟ هن چيو ته جن تي ڪرپشن جو الزام لڳائي رهيا آهيو ته توهان ڪرپشن ڇو ثابت نه ڪئي، مريم اورنگزيب چيو ته نيب ۽ ايف آءِ اي جو سمورو رڪارڊ توهان وٽ موجود هو، ڊي جي ايف آءِ اي به چيو هو ته اهي ڪيس نٿا ٺهن ته هن ايسٽ ريڪوري يونٽ ٺاهي ڇڏيو، شهزاد اڪبر نيب ۽ ايف آءِ اي کي هدايت ڪندو هو ته ڪنهن کي گرفتار ڪرڻو آهي، هن چيو ته پاڪستان جي عوام پڇي ٿي ته جيڪڏهن ڪرپشن ۽ مني لانڊرنگ ٿي آهي ته اها چار سالن ۾ ثابت ڇو ناهي ٿي، اهي ڪوڙ ان لاءِ ڳالهائيندا هئا ته انهن جي ڪارڪردگي ٻڙي آهي،
مريم اورنگزيب چيو ته اڄ اهي اليڪشن ڪميشن تي دٻاءُ وجهي رهيا آهن ته اليڪشن ڪمشنر استعيفا ڏي، استعيفا ته انهن ماڻهن کي ڏيڻ گهرجي جيڪي ان وقت اقتدار سان چنبڙيل هئا جنهن 60 لک ماڻهن کي بيروزگار ڪيو، 43 هزار جو قرض ورتو، ترقي جي شرح ٻڙي ڪئي، چيف اليڪشن ڪمشنر جڏهن انهن کان 70 لک ڊالر جو حساب گهرندو آهي ته اهي چوندا آهن ته اليڪشن ڪمشنر استعيفا ڏي، هن چيو ته عمران خان کي شهباز شريف جي ڪارڪردگي ۽ خدمت جي جذبي کان ڊپ لڳي ٿو، عمران خان کي خبر آهي ته ٻن هفتن ۾ کنڊ 85 روپين کان 70 روپيا ٿي وئي آهي، اڄ ماڻهو ميٽرو تي باعزت طريقي سان سفر ڪري رهيا آهن چار سالن کان بند منصوبا پنج ڏينهن ۾ هلايا ويا، پشاور موڙ، اسلام آباد ۽ ڀرپاسي جا ماڻهو ميٽرو جي باعزت سواري تي ايئرپورٽ وڃي رهيا آهن، هن چيو ته بجلي جي لوڊشيڊنگ ۾ گهٽتائي اچي رهي آهي، ٻن هفتن ۾ ٻيا پاور پلانٽس به هلي ويندا، عمران خان کي خبر آهي ته مسلم ليگ (ن) جهڙي طرح 14 هزار ميگاواٽ بجلي ٺاهي وئي هئي، جيڪڏهن 18 هزار ميگاواٽ بجلي ٺاهي ڇڏي ته عوام انهن جي شڪل به ياد نه رکندي. کين خبر آهي ته اتحادي حڪومت روزگار جا منصوبا پاڪستان جي عوام کي ڏئي ڇڏيا آهن ته عمران خان جو نالو وٺڻ وارو به ڪو نه هوندو. هن چيو ته پاڪستان جي عوام اڄ ان جي معاشي دهشتگردي جو نتيجو ڀوڳي رهي آهي، اٽو،کنڊ، بجلي ان جي نالائقي جي ڪري مهانگي آهي، وفاقي وزير چيو ته عمران خان چوندو هو ته منهنجي زماني ۾ ڪنهن جو بليڪ آئوٽ نه ٿيندو هو، حقيقت ۾ عمران خان جي زماني ۾ بليڪ آئوٽ نه پر صحافين جون پاسراٽيون ٽوڙيون وينديون هيون، انهن جا پروگرام بند ۽ کين اغوا ڪيو ويندو هو، هن چيو ته ميڊيا انهن جي غنڊه گردي مڃڻ کان انڪار ڪري ڇڏيو ته ميڊيا ورڪرز کي بيروزگار ڪيو ويو، ميڊيا هائوس کي معاشي طور تي ڪنٽرول ڪيو ويو، هن چيو ته پاڪستان جي عوام ٻه هفتا پهرين جي ڳالهه نه وساريندي، انهن جي غلاظت ۽ انهن جو گند اسان صاف ڪري رهيا آهيون، وفاقي وزير چيو ته عمران خان جي ڪوڙ واري سياست هاڻي نه هلندي، پاڪستان جي عوام ملڪي سياست سان عمران خان جو بليڪ آئوٽ ڪري ڇڏيو آهي، عمران خان جو بليڪ آئوٽ ميڊيا تي نه پر پاڪستان جي عوام ڪري رهي آهي، هن چيو ته حڪومت اظهار راءِ جي جي پابندي تي يقين نٿي رکي، اڄ پيمرا آزاد آهي، پيمرا اڄ سينيٽ جي اسٽينڊنگ ڪميٽي جي اجلاس ۾ به ڊيٽا گهري ته ڪهڙن چئنلن جي سروس بند ٿي،
هن چيو ته ڪوڙ ڳالهائي ماڻهن جا پٽڪا لاهي سياست نٿي ڪري سگهجي، پنهنجي ڪارڪردگي کي بهتر ڪري سياست ڪرڻي پوندي. هن چيو ته وفاقي ڪابينا ۽ حڪومت جي سمورن استحادي پارٽين جي ترجيح عوام کي رليف جي فراهمي آهي، هن چيو ته گذريل چئن سالن ۾ هر شعبي ۾ معاشي دهشتگردي ٿي، عمران خان چوي ٿو ته ڊونلڊلو ايمبيسڊر کي گهرائي ڌمڪي ڏني، اهو سازش وارو ڪاغذ ان لاءِ لهرايو پيو وڃي ڇو ته ڪارڪردگي جو صحفو خالي آهي. هن چيو ته ڪارڪردگي جي صحفي تي هڪ ڪروڙ نوڪرين مان هڪ نوڪري به نه آهي، 50 لک گهرن جي فراهمي مان هڪ گهر به نه آهي، ان خالي صحفي تي سازش جو ڪوڙو بيانيو ڪيتري دير هلائيندا، هن چيو ته ايمبيسڊر جي ميٽنگ 7 مارچ تي ٿئي ٿي، ڌمڪي 8 مارچ تي ملندي آهي ۽ کين 28 مارچ تي ياد اچي ٿو ته جڏهن ته 16 مارچ تي انهي ڊونلڊلو کي اهم مقرر طور گهرايو وڃي ٿو، جڏهن ان ڌمڪي ڏني آهي ته ان کي ڇو گهرايو ويو؟ وفاقي وزير چيو ته عمران خان ڌرڻي ۾ فارن فنڊنگ جي ذريعي ملڪ جي خلاف سازش جي ڪوشش ڪئي، عمران خان ڪرسي تي مڙهيل رهي معاشي دهشتگردي ڪئي، ملڪ جي غريب عوام کي مفلسي جو شڪار ڪيو، ڪشمير فروشي ڪئي، هن چيو ته گئس، اٽو، دوائون مهانگيون ڪيون، ماني، اٽو، کنڊ عوام کان کسي، ملڪ کي 43 ارب روپين جي قرض هيٺ ٻوڙيو، مهانگائي جي شرح 16 سيڪڙو تائين پهچائي، ترقي جي شرح منفي 4 سيڪڙو تي رکي چوندا آهن ته سازش ٿي آهي، هن چيو ته هن ملڪ جي خلاف ڪنهن ڪرسي تي زبردستي ويهي سازش ڪئي آهي ته ان جو نالو عمران خان آهي، وفاقي وزير مريم اورنگزيب چيو ته عمران خان پنهنجي سياسي مخالفن جي خلاف ڪوڙو ڳالهايو، ان تي ڪوڙا الزام لڳايا پر جيڪي دعوا ۽ واعدا پاڪستان جي عوام سان ڪيا هئا اهو صحفو به خالي آهي، هو ان صحفي کي ڀري ٻي صورت ۾ پاڪستان جي عوام جهڙي طرح ان جو بليڪ آئوٽ ڪندي، پاڪستان جي تاريخ ۾ ڪڏهن ان جو نالو وٺڻ وارو ڪير نه هوندو، هڪ سوال تي وفاقي وزير چيو ته ملڪ ۾ سياسي عدم استحڪام نه آهي، حڪومت سڪون سان پنهنجو ڪم ڪري رهي آهي، عوام کي رليف فراهم ڪيو پيو وڃي، هن چيو ته عمران خان رستن تي به هجي ته به ان کي سيڪيورٽي ڏينداسين، وفاقي وزير چيو ته پاڪستان جون گولڊن جوبلي تقريبون اچي رهيون آهن، اچو سڀ گڏجي جشن ملهايون، گولڊن جوبلي جي موقعي تي اسان جو عزم آهي ته پاڪستان ترقي ۽ خوشحالي جون منزلو طئي ڪري، پاڪستان جي عوام کي مهانگائي ۽ بيروزگاري کان ڇوٽڪارو ملي، اچو سڀ گڏجي پاڪستان جي 75 هين سالگرهه ملهايون، هڪ ٻي سوال تي وفاقي وزير مريم اورنگزيب چيو ته صحافين جي سيڪيورٽي جي حوالي سان وزيراعظم جون واضح هدايتون آهن، صحافين تي تشدد ناقابل قبول آهي، ان کي روڪڻ لاءِ صحافين ۽ ميڊيا ورڪرز سان گڏجي ميڪينزم ٺاهڻ جي ضرورت آهي،
هن چيوته جوائنٽ ايڪشن ڪميٽي ۾ صحافين کي پگهارن جي ادائيگي جو معاملو به غور هيٺ آيو، پگهارن جي ادائيگي کي يقيني بڻايو ويندو، مريم اورنگزيب چيو ته 2018ع ۾ جڏهن هو اطلاعات واري وزير هئي ته ان وقت سوشل ميڊيا م هڪ به ڀرتي جو الزام نه لڳو، الله جي فضل ۽ ڪرم سان وسيلن ۽ اختيارن جو ناجائز استعمال نه ڪيو، هن چيو ته اڳوڻي دور ۾ تحريڪ انصاف سياسي ڀرتيون ڪيون، ڊجيٽل ميڊيا ونگ ۾ اهي سمورا ماڻهو موجود هئا جيڪي تحريڪ انصاف جي آفيسن ۾ ڪم ڪندا هئا ۽ ڏينهن جو حڪومت ۽ رياست جي خلاف هوندا هئا، هن چيو ته اهڙا ماڻهو جيڪي ڪنهن پارٽي لاءِ ڪم ڪري رهيا آهن، اهي حڪومت پاڪستان جا ملازم نه هوندا. هڪ ٻي سوال جي جواب ۾ هن چيو ته چوري تي قانون پنهنجو رستو اختيار ڪندو، اسان ڪنهن تي الزام نه لڳائينداسين، اسان جوابدرن کي قانون جي ڪٽهڙي ۾ آڻينداسين، جتي جتي قومي خزاني جو نقصان ٿيو، ان تي جواب ڏيڻو پوندو. هڪ سوال تي وفاقي وزير چيو ته اسحاق ڊار جو حق هو ته کيس پاسپورٽ ملي، ڪو قانون ڪنهن پاڪستاني کي ان جي شناختي دستاويز کان محروم نٿو ڪري سگهي، جڏهن اسحاق ڊار جو دل ڪندو هو پاڪستان ايندو، هتي اچڻ کان ڪير به روڪي نٿو سگهي، وفاقي وزير ٻڌايو ته وزيراعظم سڀاڻي سعودي عرب روانو ٿي رهيو آهي، سعودي عرب سان پراڻا دوستاڻا لاڳاپا آهن، وزيراعظم جي سعودي عرب جي حوالي سان تفصيل ميڊيا کي جاري ڪيا ويندا، انشاءُ الله وزيراعظم جو سعودي عرب جو دورو ڪامياب ٿيندو، هڪ سوال جي جواب ۾ اطلاعات واري وزير چيو ته آئيني طريقي سان عدم اعتماد جي ذريعي نااهل چور ٽولي کي پارليامينٽ کان ٻاهر اڇليو ويو آهي، آئين موجب عمران خان اعتماد وڃايو آهي، پاڪستان جي عوام کيس رد ڪيو آهي.
