ڪراچي – 20 – مئي (اي پي پي) وزيراعظم محمد شهباز شريف چيو آهي ته اڳوڻي حڪومت ساڍا ٽن سالن ۾ ترقي جو هڪ به منصوبو شروع نه ڪيو ۽ نه ئي عوام کي هڪ رپئي جو ريليف ڏنو تنهن ڪري هاڻي سياسي ۽ اقتصادي لحاظ سان ملڪ مشڪل ترين حالتن مان گذري رهيو آهي، ملڪ کي کوکلو ۽ برباد ڪري هاڻي وفاداري ۽ غداري جا سرٽيفڪيٽ ورهايا پيا وڃن، جڏهن گذريل حڪومت کي خبر پئجي وئي ته حڪومت وڃي رهي آهي ته چال هلي ۽ پيٽروليم مصنوعات جي قيمتن ۾ اضافو روڪي ڇڏيو، غريب ماڻهو جي مشڪلاتن جو احساس آهي ان لاءِ پُرآسائش شين جي درآمد تي پابندي هڻي ساليانو 4 ارب ڊالر بچائينداسين، سولر تي ٽيڪس گهٽ ڪنداسين، دوست ملڪ قرض رول اوور ڪري رهيا آهن، چين سولر ۽ ونڊ جي لاءِ سيڙپڪاري ڪرڻ لاءِ تيار آهي. ايوان صنعت ۽ واپار ڪراچي ۾ خطاب ڪندي وزيراعظم چيو ته مون وزارت عظميٰ جو حلف کنيو ته ڊالر 189 تي هو، انهي ڏينهن 8 رپيا سستو ٿيو ۽ اسٽاڪ مارڪيٽ ۾ به تيزي آئي، آئون هتي ڪا پوائنٽ اسڪورنگ ڪرڻ نه آيو آهيان پر جڏهن گذريل حڪومت کي خبر پئي ته بي اعتمادي جي رٿ ڪامياب ٿي ويندي ته انهن کي ڪنهن چالاڪ ماڻهو مشورو ڏنو ته پيٽرول جي قيمتن ۾ اضافو روڪي ڇڏيو، ايندڙ حڪومت جي لاءِ ڄار وڇايو ويو ۽ پاڪستان جيڪو اڳ ۾ ئي قرضن جي ڌٻڻ ۾ ٻڏل هو ان جي لاءِ مشڪلاتون پيدا ڪري ڇڏيون، ساڍي ٽي سالن ۾ اڳوڻي حڪومت عوام کي پيٽرول، کاڄرو تيل، کنڊ ۽ گيهه جهڙي ضروري شين جي مد ۾ هڪ رپئي جو ريليف نه ڏنو ۽ نه ئي پاڪستان جي معاشي اقتصادي ۽ سماجي ترقي جي لاءِ ڪو منصوبو ٺاهيو ويو جڏهن ته 22 هزار ارب جا قرض ورتا ويا ان وقت ملڪ ۾ ڪا افراتفري نه هئي، لاڏلي حڪومت ۽ لاڏلي کي اها سپورت ڏني وئي جيڪا پاڪستان جي 75 سالا تاريخ ۾ ڪنهن کي نه ملي ۽ نه ملندي، اهڙي سپورٽ جيڪا لاڏلي کي ملي، جيڪڏهن اسان جي حڪومت کي 30 سيڪڙو به ملي هجي ها ته پاڪستان راڪيٽ وانگر مٿي وڃي ها، ان ۾ ڪا ٻي راءِ نه آهي نه ئي اهي خيالي دنيا جي ڳالهه آهي. هن چيو ته اسان سي پيڪ تي ڪم تيزي سان ڪرايو هو، اسان لوڊشيڊنگ جو مسئلو حل ڪيو هو، پورٽ قاسم، پنجاب سميت مختلف جاين تي اسان بجلي جا منصوبا شروع ڪيا، ونڊ مل ۽ پن بجلي ملڪ جي ضرورت آهي، جيتري تيزي سان ۽ سستي بجلي جا منصوبا اسان هنيا تاريخ ۾ ان جو مثال نه ٿو ملي، اسان جي انهن قدمن جي ڪري ملڪ مان لوڊشيڊنگ ختم ٿي، اڳوڻي دور جي ڪرپشن ۽ نااهلي جي ڪري لوڊشيڊنگ ٻيهر شروع ٿي، اڳوڻي حڪومت جيڪو اربين ڊالر جو قرض ورتو ڪيڏانهن ويو، قوم چڀندڙ سوالن جا جواب گهري ٿي، اڳ ۾ کنڊ ۽ ڪڻڪ برآمد ۽ پوءِ درآمد ڪئي وئي ڇا اهو افراتفري جو نتيجو نه هو، ايل اين جي قيمت جڏهن گهٽ هئي ته خريد نه ڪئي وئي، جڏهن مهانگي ٿي ته سودا ڪيا ويا، ايمانداري سان تجزيو ڪرڻ گهرجي. هن چيو ته ساڍا ٽي سال ملڪ کي کوکلو ۽ برباد ڪرڻ کانپوءِ هاڻي غداري ۽ وفاداري جا سرٽيفڪيٽ ورهايا پيا وڃن. هن چيو ته عام ماڻهو جي زندگي تباهه ٿي چڪي آهي، اهڙي صورت ۾ پُرآسائش ۽ غيرضروري شين جي لاءِ حڪومت هڪ مدي جي لاءِ درآمد تي پابندي هنئي آهي، اسان چاهيون ها ته ڊيوٽي به وڌائي سگهياسين پئي پر ڊيوٽي جيڪڏهن 200 سيڪڙو به ڪري ڇڏيون ته الله جن کي حيثيت ڏني آهي اهي پوءِ به اهي پُرآسائش شيون گهرائيندا، اسان کي ڪنهن به طرح پرڏيهي ناڻو بچائڻو آهي. وزيراعظم چيو ته اسان 4 ارب ڊالر جو کاڄرو تيل درآمد ڪريون ٿا، اسان پُرآسائش شين جي درآمد تي پابندي هڻي کاڄرو تيل جي لاءِ پئسا بچائي سگهون ٿا، اها قومي خدمت آهي، جڏهن مشڪل اچي وئي آهي ته قرباني ڏيڻي پوندي ۽ اها قرباني انهن کي ڏيڻي پوندي جن کي الله وڌيڪ نوازيو آهي. وزيراعظم چيو ته غريب ماڻهو يتيم، بيواهه جن وٽ دوا، کير ۽ بنيادي ضرورتن جي لاءِ پئسا نه آهن اهي ڏسن ٿا ته اشرافيه پُرآسائش شيون گهرائي ٿي، هر شيءَ ٻاهران گهرائڻ سان مقامي انڊسٽري جو به نقصان ٿئي ٿو. وزيراعظم چيو ته حڪومتي قدمن سان ملڪ ۾ استحڪام ايندو، واپارين ۽ صنعتڪارن کي ان ۾ پنهنجو ڪردار ادا ڪرڻو پوندو، اسان کي گڏجي ملڪ جي تقدير بدلائڻي آهي، جيڪڏهن جاپان، جرمني ۽ چين مشڪل حالتن مان نڪري دنيا جي وڏي معاشي طاقتون بڻجي سگهن ٿا ته ڇا اسان جي تقدير ۾ لکيل آهي ته اسان سدائين ڀڪاري رهنداسين؟ نه. هن چيو ته ڏينهن رات محنت ڪرڻي پوندي ۽ خون پسينو وهائڻو پوندو ۽ ڪمزور تي شفقت جو هٿ رکڻو پوندو. وزيراعظم چيو ته اسان ائٽمي طاقت آهيون ۽ ڪنهن اسان تي ميري نظر وڌي ته ان کي خاڪ ۾ ملائي سگهون ٿا پر اسان آءِ ٽي جي شعبي ۾ ڀارت کان پٺتي رهجي ويا آهيون، اسان جا نوجوان قابل آهن ۽ اسان آءِ ٽي ۾ ڀارت جو مقابلو ڪري سگهون ٿا، مون آءِ ٽي جي وزير کي چيو آهي ته ٻن سالن ۾ آءِ ٽي جي شعبي ۾ 15 ارب ڊالر جي ايڪسپورٽ جو منصوبو ٺاهيو وڃي. وزيراعظم سنڌ حڪومت تي زور ڏنو ته اتحادي پارٽين ۽ ڪاروباري برادري سان گڏجي ويهي منصوبا ٺاهي ۽ سعودي عرب جي هڪ ارب ڊالر جي سيڙپڪاري جي تحفي مان فائدو کڻندي ڊي سيلينيشن پلانٽ لڳائي، سمورن صوبن ۾ آءِ ٽي ٽاور ٺهن ۽ نوجوانن کي تربيت فراهم ڪئي وڃي ته آءِ ٽي اسان جي سڀ کان وڏي صنعت بڻجي سگهي ٿي. وزيراعظم چيو ته هڪ شفاف پاليسي جي ذريعي وفاق ۽ صوبا گڏجي ايڪسپورٽ انڊسٽريل زون ٺاهي سگهن ٿا، جڳهه جي نشاندهي ڪري ان تي انفراسٽرڪچر کي هٿي وٺرائي وڃي ۽ ايڪسپورٽرز کي زمين مفت ڏني وڃي ته جيئن اهي صنعتون لڳائين، ان جي لاءِ ون ونڊو آپريشن هجي ۽ بئنڪن کان قرض به جاري ڪيا وڃن ته اسان درآمدي بدران برآمدي ملڪ بڻجي سگهون ٿا. وزيراعظم چيو ته ڳوٺن ۾ ايگرو بيسڊ انڊسٽريز لڳايون وڃن ته جيئن شهرن طرف لڏپلاڻ جو رجحان گهٽ ٿئي، اهي قدم کنيا ته اسان کي منتون ڪري جي ايس پي پلس ڪرائڻ جي ضرورت نه رهندي. وزيراعظم چيو ته چين اسان جو بهترين دوست آهي پر سي پيڪ تي هٿ ٺوڪين الزامن سان ان کي ناراض ڪيو ويو ۽ منصوبن تي ڪم سست ٿي ويو، چين ڪراچي سرڪلر ريلوي جي لاءِ مون کي خاطري ڪرائي آهي، هاڻي اسان کي پاڻ اڳتي وڌي عملي قدم کڻڻا آهن. وزيراعظم ڪراچي جي صنعتڪارن پاران تجويز جي جواب ۾ چيو ته بنا ڪنهن شڪ جي سنڌ 62 سيڪڙو گئس فراهم ڪري ٿو پر اهڙو فارمولو ٺاهيو وڃي جو ڪراچي جي صنعت کي به فائدو ٿئي ۽ پاڪستان کي به، جيڪڏهن گهريلو گئس بند ڪنداسين ته عوام کي مشڪل ٿي ويندي. وزيراعظم چيو ته پاڪستان ساليانو 20 ارب ڊالر جي پيٽروليم مصنوعات درآمد ڪرڻ کي برداشت نه ٿو ڪري سگهي، اسان جي امپورٽ ايڪسپورٽ ۾ 45 ارب ڊالر جو فرق آهي، اهو اسان ڪٿان پورو ڪنداسين، اسان کي توانائي جي متبادل ذريعن طرف وڃڻو پوندو، سنڌ، بلوچستان، خيبرپختونخواهه ۽ پنجاب سميت ملڪ ۾ سولر ۽ ونڊ جا منصوبا شروع ڪري سگهجن ٿا پر ان ۾ ڪجهه وقت لڳندو، گرين انرجي سان 20 ارب ڊالر بچائي سگهجن ٿا، الله پاڪستان کي سج ۽ هوا سميت قدرتي وسيلن ۽ نعمتن سان مالامال بڻايو آهي، اڳوڻي حڪومت جيڪڏهن پنهنجي ساڍي ٽي سالا دور ۾ عوام جي لاءِ ڪجهه ڪري ها ته اسان انهن کي سليوٽ ڪريون ها. وزيراعظم چيو ته اسان اقتصادي ۽ سياسي لحاظ سان مشڪل ترين حالتن مان گذري رهيا آهيون، 2018ع ۾ مون پنهنجي پهرين تقرير ۾ چيو هو ته چارٽر آف اڪانومي ٺاهيو پر منهنجي تذليل ڪئي وئي ۽ مذاق اڏايو ويو، آمريڪا ۾ فارن پاليسي سميت قومي پاليسي حڪومت سان تبديل نه ٿي ٿئي، قومي بقاءَ، سلامتي ۽ خوشهالي جي ايشوز تي سڄي قوم هڪ هوندي آهي، اسان کي سولر ۽ ونڊ تي اڳتي وڌڻو پوندو، سيڙپڪار موجود آهن، چين ان شعبي ۾ سٺي سيڙپڪاري جي لاءِ تيار آهي، جادو سان حالتون تبديل نه ٿينديون، هينئر منهنجي دوست ملڪ سان ڳالهه ٿي آهي اهو اسان جا قرض رول اوور ڪري رهيو آهي، اسان 75 سالن کان قرض وٺي ڪم هلائي رهيا آهيون. وزيراعظم سولر تي 17 سيڪڙو ٽيڪس ختم ڪرڻ جو اعلان ڪيو. هن چيو ته جيستائين الله تعاليٰ زندگي ڏني اهي خادم بڻجي قوم جي خدمت ڪندو رهندس.
