اسلام آباد – 23 – جون (اي پي پي) وزيراعظم شهباز شريف اڳ ۾ رياست ۽ پوءِ سياست کي اتحادي حڪومت جي ترجيح قرار ڏيندي چيو آهي ته آءِ ايم ايف سان شرط طئي ٿي ويا آهن، چين پاڪستان کي 2.3 ارب ڊالر فراهم ڪري رهيو آهي، اڳوڻي حڪومت جي سنگين غلطين سان ملڪ ناقابل تلافي نقصان پهتو، دوست ملڪن سان لاڳاپا خراب ڪيا، آءِ ايم ايف سان 30 رپيا پيٽروليم ڊيولپمينٽ ليوي ۽ 17 سيڪڙو سيلز ٽيڪس جو معاهدو ڪيو، ساڍا ٽي سال قوم کي هڪ رپئي جو به ريليف نه ڏنو، موجوده حڪومت پيٽروليم مصنوعات جي قيمتن ۾ مجبوري ۾ اضافو ڪيو، پهريون ڀيرو سرنديءَ وارن ماڻهن تي ٽيڪس هنيو پيو وڃي، لوڊشيڊنگ تي ضابطو آڻينداسين، پاڪستان وڃايل مقام جلد حاصل ڪندو. اهڙن خيالن جو اظهار هن مسلم ليگ (ن) جي سينيٽرن کي خطاب ڪندي ڪيو. وزيراعظم چيو ته اڳوڻي حڪومت آءِ ايم ايف سان جيڪو معاهدو ڪيو ان تي عمل نه ڪيو، ماضي ۾ دنيا ۾ جڏهن به پيٽروليم مصنوعات جي قيمتون وڌيون ته ملڪ ۾ وڌايون وينديون هيون پر قيمتن ۾ گهٽتائي عوام کي منتقل نه ڪيون وينديون هيون، اڳوڻي حڪومت آءِ ايم ايف جون سموريون شرطون مڃي وريون هيون، آءِ ايم ايف سان 30 رپيا پيٽروليم ڊيولپمينٽ ۽ 17 سيڪڙو سيلز ٽيڪس لڳائڻ جو معاهدو ڪيو پر عالمي منڊي موجب قيمتون وڌائڻ جي واعدي تي عمل نه ڪيو ۽ پنهنجي ڪيل معاهدي جون ڌڄيون اڏائي ڇڏيون، مارچ ۾ جڏهن عالمي منڊي ۾ تيل جون قيمتون وڌيڪ هيون ته پي ٽي آءِ حڪومت بي اعتمادي رٿ ۾ پنهنجي شڪست کي ڏسندي اوچتو قيمتون گهٽ ڪري ڇڏيون، پي ٽي آءِ حڪومت تيل جي مد ۾ ڪا رقم نه رکي ۽ نه ئي ڪابينا کان منظوري ورتي، ان جو مقصد اهو هو ته اهي ايندڙ حڪومت جي لاءِ ڄار وڇائي ويا، تيل جون قيمتون وڌڻ تي ميان نواز شريف سميت سڀني سياسي اڳواڻن کي ڳڻتي هئي. وزيراعظم چيو ته اڳوڻي حڪومت ساڍا ٽي سال غريب عوام کي هڪ رپئي جو ريليف نه ڏنو پر ملڪ کي مشڪل ۾ وڌو. وزيراعظم چيو ته پاڪستان قائم ڪرڻ جي لاءِ لکين ماڻهن پنهنجي جانين جي قرباني ڏني پر گذريل 75 سالن ۾ پاڪستان قائم ڪرڻ جو مقصد حاصل نه ٿيو، پاڪستان جي لاءِ قربانيون ڏيندڙن جي ذهن ۾ اهو تصور هو ته هتي ميرٽ، ايمانداري ۽ ديانتداري جو مان مٿاهُون ٿيندو ۽ هي ملڪ ڪرپشن کان پاڪ هوندو، اسان جا پاڙيسري ملڪ پنهنجي رستي جو پاڻ تعين ڪري ۽ اتحاد تنظيم تي عمل ڪري اسان کان گهڻو اڳتي نڪري ويا آهن، چين، گڏيل عرب امارات، قطر، سعودي عرب ۽ ٻين اسلامي ملڪن سدائين پاڪستان جو ساٿ ڏنو، چين پاڪستان کي مشڪل صورتحال مان ڪڍڻ جي لاءِ 2.3 ارب ڊالر فراهم ڪرڻ جو واعدو ڪيو آهي، اسان کي هاڻي پنهنجي اصلاح ڪرڻي آهي، پاڪستان قدرتي وسيلن سان مالامال آهي، ريڪوڊڪ جهڙو منصوبو فعال نه ٿيو، هتي اربين کربين ڊالر جا خزانا آهن پر اسان اڄ به ان مان فائدو نه کڻي رهيا آهيون، اهو قوم جو نه قيادت جو قصور آهي، جنهن غلط طريقي سان معاملن کي هلايو، اهڙا ڪيترائي مثال به آهن. هن چيو ته ماضي ۾ ڏسڻ ۽ روئڻ ڌوئڻ سان ڪجهه حاصل نه ٿيندو، فيصلو ڪري وٺو ته تاريخ جو رخ موڙڻو آهي، پوءِ الله تعاليٰ به اسان جي مدد ڪندو، ملڪ کي بحران مان ڪڍڻ جي لاءِ ڏينهن رات محنت ڪنداسين، پاڪستان اڄ مشڪل وقت مان گذري رهيو آهي، ماضي جي حڪومت چين سميت دوست ملڪن سان لاڳاپا خراب ڪيا، چين ۽ سعودي عرب ڪيستائين اسان جي مدد ڪندا، اهي به اهو سوچيندا ته پاڪستان ڪڏهن پنهنجي پيرن تي بيهندو. هن چيو ته پي ٽي آءِ جي بدترين غفلت ۽ ڪرپشن جي ڪري ملڪ کي اڄ اهڙين حالتن کي منهن ڏيڻو پيو آهي، اهي اندر 19 نه انڊر 12 هئا جن قوم جا وسيلا برباد ڪيا، ڪڻڪ، کنڊ، گئس سميت ڪيترن ئي شعبن ۾ اسڪينڊلز سامهون اچي رهيا آهن، اسان کي قيمتون مجبوري ۾ وڌائڻيون پيون آهن، اتحادي حڪومت فيصلو ڪيو آهي ته اڳ ۾ رياست ۽ پوءِ سياست ٿيندي، اسان کي پنهنجي ملڪ جو مقدر بدلائڻو آهي. هن چيو ته آءِ ايم ايف سان شرط تقريبن طئي ٿي چڪا آهن، جيڪڏهن وڌيڪ شرط نه لڳايا ويا ته ايندڙ ڪجهه ڏينهن ۾ معاهدو ٿي ويندو، اسان کي آءِ ايم ايف معاهدي جي ذريعي معاشي صورتحال کي بهتر بڻائڻو آهي، پر خوشحالي رات وچ ۾ ناهي ايندي، اسان کي مالياتي استحڪام آڻڻو آهي، اسلامي ملڪن سان لاڳاپا بهتر بڻائڻ ۽ واپار وڌائڻ جي لاءِ قدم کڻنداسين، آءِ ايم ايف به چوي ٿو ته اڳوڻي حڪومت پاران ڪيل معاهدي جون شرطون پوريون ڪيو ڇو ته اسان کي اعتماد نه آهي. وزيراعظم چيو ته اسان جو رستو مشڪل ضرور آهي ناممڪن نه آهي، اڃا مشڪلاتون اچڻيون آهن، قومي ترقي ۽ خوشحالي جي فيصلن کي سرفهرست رکنداسين، ذاتي پسند ۽ ناپسند کان مٿانهون ٿي ترقي ۽ خوشحالي اسان جي اولين ترجيح هوندي، قوم سان غلط بياني نه ڪندس ۽ نه ئي قوم کي دوکو ڏينداسين، اهو نه چونداسين ته 300 ارب ڊالر کڻي اينداسين، کير ۽ ماکيءَ جون نديُون وهائڻ ۽ نئين پاڪستان جي ڳالهه نه ڪنداسين، پاڪستان اهو ئي آهي جيڪو قائداعظم جو پاڪستان آهي، قوم کي ترقي ۽ خوشحالي طرف وٺي وڃڻ جي لاءِ حڪومت، سياسي قيادت ۽ سمورن ادارن کي گڏجي ڪم ڪرڻو پوندو. وزيراعظم چيو ته بجيٽ ۾ عام ماڻهو تي بار پيو آهي پر عام ماڻهو کي ريليف ڏيڻ جي لاءِ 2 هزار رپيا ڏيڻ جو فيصلو ڪيو، وڌيڪ ريليف به ڏينداسين، ڪجهه ڏينهن ۾ قوم کي خطاب ڪندس، تاريخ ۾ پهريون ڀيرو بجيٽ ۾ سرندي وارن ماڻهن تي نيٽ انڪم ٽيڪس لڳايو پيو وڃي، عام ماڻهو سدائين ملڪ جي لاءِ قرباني ڏني آهي، آبادگارن ۽ مزدورن جي ڪري زراعت ۽ صنعت هلي ٿي. هن چيو ته اسپتالن ۾ ميان نواز شريف جي دور ۾ ڏني ويندڙ مفت دوائن ۽ علاج جي سهولت پي ٽي آءِ حڪومت ختم ڪري ڇڏي، ليپ ٽاپ اسڪيم تي سياست ڪئي وئي جيڪي ڪورونا جي دوران نوجوانن جي لاءِ روزگار جو وسيلو بڻيا. وزيراعظم چيو ته قومون هڪ ٿي ڏينهن رات محنت سان بڻجنديون آهن، دنيا ۾ جڏهن گئس جون قيمتون گهٽ هيون ته ماضي جي حڪومت ڪو ڊگهي مدي وارو معاهدو نه ڪيو، جيڪڏهن معاهدو ڪيو ويو هجي ها ته اڄ ملڪ کي سستي گئس مهيا ٿي رهي هجي ها، نواز شريف جي دور ۾ 13 ڊالر تي ايل اين جي ملي رهي هئي، ملڪ ۾ گئس جا ذخيرا تيزي سان گهٽ ٿي رهيا آهن، اسان کي گئس جي ضرورت آهي پر هاڻي ملي نه رهي آهي، ملڪ ۾ لوڊشيدنگ جي خاتمي لاءِ پوري طرح ڪوششون ڪري رهيا آهيون، عوام کي مهانگائي، بيروزگاري ۽ ٻيا مسئلا درپيش آهن، لوڊشيدنگ تي ضابطو آڻينداسين، پي ٽي آءِ جي حڪومت سنگين غلطيون ڪيون جنهن سان معيشت کي ناقابل تلافي نقصان پهتو، اسان صورتحال کي بهتر بڻائڻ جي لاءِ قدم کڻنداسين، جڏهن موجوده حڪومت اقتدار ۾ آئي ته اليڪشن جي حوالي سان اتحادين ۾ مختلف راءِ هئي پر پوءِ اتحادي حڪومت فيصلو ڪيو ته اسان پنهنجو آئيني مدو پورو ڪنداسين، مسلسل محنت ۽ هڪ جهڙائي سان گڏ اڳتي وڌنداسين، موجوده صورتحال جي حوالي سان توهان ماڻهن کي اعتماد ۾ وٺڻ لاءِ گهرايو ويو، چين سدائين پاڪستان جو ساٿ ڏنو، چين جي حڪومت سان سي پيڪ جي بحالي ۽ ايم ايل ون منصوبي تي ڳالهه ٿي آهي، چين جي وزيراعظم ايم ايل ون منصوبي ۾ تعاون جي خاطري ڪرائي آهي، ساهيوال، پورٽ قاسم، ٿر ۽ حب ۾ 1300، 1300 ميگاواٽ جي بجلي جي پيداوار جا منصوبا ان وقت لڳايا ويا هئا جڏهن ملڪ ۾ 20، 20 ڪلاڪن جي لوڊشيڊنگ ٿيندي هئي. هن چيو ته ترڪيءَ ۽ سعودي عرب سدائين ڪشمير مسئلي تي پاڪستان جي حمايت ڪئي پر اسان جي روايت ۽ پراڻن لاڳاپن کي نقصان پهچايو ويو، حڪومت سنڀالڻ کانپوءِ ڪيترائي چئلينجز درپيش هئا، الله تعاليٰ ان قوم جي اصلاح ڪري ٿو جيڪا پاڻ پنهنجي اصلاح جي لاءِ تيار هجي، ماضي جي حڪومت جي غلط فيصلن جو خميازو اڄ عوام ڀوڳي رهي آهي پر موجوده حڪومت صحيح رخ ۾ اڳتي وڌي رهي آهي. وزيراعظم جاپان، چين، جرمني سميت مختلف ملڪن جو مثال ڏنو جيڪي ترقي جي ڊوڙ ۾ ڪڏهن اسان کان پوئتي هئا پر ڏينهن رات محنت سان ترقي يافته ملڪ بڻجي ويا. وزيراعظم چيو ته جلد اهو وقت ايندو ته پاڪستان پنهنجو وڃايل مقام حاصل ڪندو. هن چيو ته قرآن مجيد جا حڪم، اسوه رسول ﷺ ۽ اقبال جا شعر اسان جي لاءِ رهنمائي فراهم ڪن ٿا. وزيراعظم چيو ته هو ڏينهن رات ملڪ کي درپيش مختلف مسئلن ۽ چئلينجن بابت اجلاس منعقد ڪري ٿو ۽ هر وقت ملڪ جي بهتري لاءِ سرگرم آهي. هن چيو ته روشن ڊيجيٽل اڪائونٽس جي حوالي سان ڪالهه وڏي خوشخبري ملي ۽ ٻاهرئين ملڪ رهندڙ پاڪستانين مٽاسٽا جو ناڻو موڪلڻ جو رڪارڊ قائم ڪري ڇڏيو، اڳوڻي حڪومت کي سچ ڳلهائڻ گهرجي ۽ قوم کان معافي وٺڻ گهرجي پر دوکو ڏيڻ ۽ ڪوڙ ڳالهائڻ انهن جي سياست آهي. وزيراعظم چيو ته اسان کي هوش کان ڪم وٺڻو آهي ۽ پاڪستان جي تقدير بدلائڻ جو فيصلو ڪرڻو آهي، ترقي يافته قومن جي نقش قدم تي هلڻو آهي، الله اسان کي تمام گهڻيون نعمتن ۽ وسيلن سان نوازيو آهي، پاڪستان هر قسم جي وسيلن اسان مالامال آهي، اڳوڻي وزيراعظم نواز شريف ملڪ ۾ وڏن ڊيمن جو سنگ بنياد رکيو، ڊيمن مان 40 هزار ميگاواٽ بجلي پيدا ڪرڻ جي گنجائش موجود آهي، اهي منصوبا ڏهاڪن تي مڪمل ٿيڻ گهرجن ها، اسان مشڪلاتن کي منهن ڏيندي پاڪستان کي خوشحالي جي راهه تي گامزن ڪرڻ جي لاءِ ڪا ڪسر نه ڇڏينداسين، ان لاءِ عملي قدم کڻڻا پوندا، 12 وڳي اٿي ڀاشن ڏيڻ سان ملڪ ترقي نه ٿو ڪري، ڏينهن رات محنت کي پنهنجو شعار بڻائڻو پوندو. وزيراعظم چيو ته آهستي آهستي ڪستو ٽوڙي سک جو ساهه کڻنداسين ۽ قومي وسيلن کي استعمال ۾ آڻينداسين.
