اسلام آباد ۔ 3 جون (اے پی پی) گزریل چووی گھنٹے دے دوران پورے ملک اچ کورونا وائرس دے ساریں توں ودھ 17,310 ٹیسٹ کیتے گئن ، شرح اموات اچ وی کمی واقع تھئی اے ۔ نیشنل کمانڈ اینڈ آپریشن سینٹر توں جاری تازہ اپ ڈیٹ دے مطابق پورے ملک اچ کورونا دے ایکٹو کیسز دی تعداد 49 ہزار 852، تصدیق شدہ کیسز دی تعداد وی80 ہزار 463 تئیں پج گئی اے ۔گزریل 24 گھنٹے دے دوران 4131 نویں کیس رپورٹ تھئن ، 67 مزید اموات دے نال مجموعی اموات 1688 تھی گئن ۔صوبیں ، صنعتاں ٹرانسپورٹ، مارکیٹاں تے دکانداراں کوں سختی دے نال ایس او پیز تے عمل درآمد کریندے ہوئیں ماسک پاونڑ دی ہدایت کیتی گئی اے ۔این سی او سی موجب سندھ اچ ساریں توں ودھ 31 ہزار 86 کورونا کیسز رپورٹ تھئن ،پنجاب اچ کیسز دی تعداد 29 ہزار 489 ، خیبرپختونخوا اچ 10ہزار 897 اتے اسلام آباد اچ 3188 تھی گئی ۔ بلوچستان اچ 4740، گلگت بلتستان اچ 779 کیسز رپورٹ تھئن ۔ آزاد کشمیراچ کورونا وائرس کیسز دی تعداد 284 اے۔ پورے ملک اچ ہنڑ تئیں 28 ہزار 923 مریض مکمل طور تے صحت یاب تھی گئن ۔ این سی او سی موجب گزریل 24 گھنٹے اچ 67 اموات تھئن ۔
