اسلام آباد۔4اگست(اے پی پی) وفاقی وزیر امورکشمیر و گلگت بلتستان انجینئر امیر مقام آکھیے 5 اگست دے ہندوستانی اقدام دے خلاف دنیا اچ یوم استحصال منایا ویسی ، 5 اگست جموں و کشمیر دی تاریخ دا سیاہ ترین باب اے، پاکستان کشمیریاں دی جدوجہد آزادی دے منطقی انجام تئیں انہاں دی سیاسی، سفارتی اتے اخلاقی حمایت جاری رکھیسی ، یوم استحصال دے موقع تے ساریاں سیاسی جماعتاں کوں ھک مٹھ تھی تے بھارتی اقدامات دے خلاف احتجاج کرن۔ پریس انفارمیشن ڈیپارٹمنٹ اچ حریت رہنماواں دے رلے پریس کانفرنس توں خطاب کریندے وفاقی وزیر کشمیر و گلگت بلتستان انجینئر امیر مقام آکھیے 1947ء توں کشمیریاں دی جدوجہد آزادی جاری اے، کشمیریاں پاکستان بݨݨ توں پہلے پاکستانی ہووݨ دا نعرہ لاتا ہئی ۔ انہاں آکھیے کشمیریوں دی صلاح موجب کشمیر دے جھیڑے دا حل تھیوݨا چاہیدے تے ایں حوالے نال سلامتی کونسل دی قرارداداں تے عمل تھیوݨا چاہیدے ، ہندوستان دی طرفوں جبرنال کشمیریاں دی جدوجہد کوں دٻاوݨ اچ ناکامی تے پاکستان دی طرفوں اساں کشمیری عوام کوں سلام پیش کریندوں ، او ہر جبر دے سامݨے ڈٹ تے کھڑن ، لکھاں جاناں دیاں قربانیاں ݙتن، قیدوبند دیاں صعوبتاں برداشت کیتن ، انھاں دا قصور صرف اے ہے جو او اپݨا بنیادی حق منڳدن ۔ انہاں آکھیے 5 اگست 2019 کوں ہندوستان دی طرفوں غیرقانونی زیر قبضہ کشمیر دی خصوصی آئینی حیثیت ختم کرݨ دا اقدام چاتا ڳئے ۔ جمہوریت دے نام نہاد علمبردار دے ایں اقدام کوں پنج سال پورے تھی ڳئن ۔ انہاں پنج سالاں اچ 887 کشمیری شہید تھئن، ہزاراں زخمی اتے انہاں کوں جیلاں اچ سٹیا ڳئے ۔ کشمیر اچ بھارت دی طرفوں ظلم دا نہ رکݨ آلا سلسلہ جاری اے ، اقوام متحدہ دی سلامتی کونسل وی انھاں اقدامات دی مذمت کیتی اے ۔ اقوام متحدہ دی قرارداداں بھارت دے آئین اچ تبدیلی نال بدل نی سڳدی ، او قرارداداں آپݨی جاہ تے موجود ہن ، پاکستان کشمیریاں دی جدوجہد دی سیاسی، سفارتی اتے اخلاقی حمایت کوں اپݨا فرض سمجھدے تے او اے حق ادا کریندا رہسی اساں اے مطالبہ کریندوں جو کشمیر دے حوالے نال اقوام متحدہ دی قرارداداں تے عمل تھیوݨا چاہیدے، دنیا اچ ایں ویلھے مسلماناں داخون ارزاں اے۔ انہاں آکھیے او آئی سی توں اپیل کریندوں او عملی طور تے مظلوم مسلماناں دی نمائندگی کرے اتے عملی اقدامات چاوے۔ انہاں آکھیے جموں و کشمیر ھک جیل دا مںظر پیش کریندا پئے، اساکوں کشمیریاں تے ماݨ اے جنھاں بہادری نال ہر جبر دامقابلہ کیتے تے کشمیر بݨسی پاکستان دا نعرہ بلند کریندے آندن ۔ انہاں آکھیے بھارت اپݨے ظلم تے پردہ پاوݨ سانڳے ایں جدوجہد کوں کݙاہیں دہشت گردی دا ناں ݙیندے تے کݙاہیں ایندا الزام پاکستان تے سٹ ݙیندے آپݨے حق سانڳے جدوجہد دہشت گردی کائنی ، دہشت گردی دا شکار تاں پاکستان اے۔ انھاں کشمیریاں کوں یقین ݙیوائے جو او کشمیرجھیڑے دے پرامن حل تئیں کشمیریاں دی جدوجہد دی حمایت جاری رکھیسی ۔ 5 اگست دے اقدام دی مذمت دے طور تے ہر سال یوم استحصال منایا ویندے، دنیا اچ ایں اقدام دے خلاف اپݨا احتجاج ریکارڈ کرویندن۔ وزیراعظم ایں واری خصوصی ہدایت جاری کیتی اے جو پاکستان اچوں کشمیریاں کوں اے سنھیا ونڄݨا چاہیدے جو اساں انہاں دے رلے ہیسے ۔ سارے پاکستانی ایں احتجاج اچ ودھ چڑھ تے شریک تھیون ۔ قومی اسمبلی، سینیٹ اتے صوبائی اسمبلیاں کوں وی کشمیریاں دے حق اچ قرارداداں دی منظوری دی ہدایت کیتی اے ، قومی اسمبلی اچ صبحائیں قرار داد پیش کیتی ویسی ۔ ایں وچ حکومت اتے اپوزیشن دے ارکان دے دستخط شامل ہن۔ امیر مقام آکھیے کشمیر دے مسئلے تے پوری قوم اپݨی سیاسی وابستگیاں کوں ھک پاسے رکھ تے ھک زبادن ہووݨی چاہیدی اے ۔ انہاں فلسطین دے حق اچ متفقہ قرارداد تے ساریاں جماعتاں دا شکریہ ادا کریندے آکھیے ایہو سنھیا کشمیریاں سانڳے وی ویسی ۔ اساں پوری دنیا اچ آپݨے سفارتخانیں کوں وی یوم استحصال مناوݨ دی ہدایت کیتی اے تاں جو دنیا اچ جمہوریت تے یقین رکھݨ آلیں کوں اے سنھیا ݙتا ونڄے جو او ایں ضمن اچ ساݙی حمایت کرن۔ انہاں آکھیے ریڈیو پاکستان توں ڈی چوک تئیں واک کیتی ویسی ، ارکان پارلیمنٹ تے سیاسی قیادت توں ایندے اچ شرکت دی درخواست کیتی ڳئی اے تاں جو دنیا کوں اے سنھیا ملے جو کشمیر دے مسئلے تے ساریاں سیاسی جماعتاں ھک مٹھ ہن ۔ ساریاں وزارتاں تے محکمے وی ایندے اچ شرکت کریسن ۔ ایں توں انڄ تصویری نمائش سودھے ٻئی تقریباں تھیسن ، وزارت اطلاعات و نشریات دا وی شکریہ ادا کریندوں انہاں قومی میڈیا کوں خصوصی پروگرام چلاوݨ دی ہدایت کیتی تاں جو انہاں دے ذریعے دنیا کوں کشمیر اچ تھیوݨ آلے ظلم دا ݙسایا ونڄ سڳے ، نجی چینلز توں وی توقع اے ایں ݙینھ دی مناسبت نال خصوصی پروگرام چلیسن ۔ پی آئی اے، این ایچ اے، میٹرو سودھے ہر محکمہ کوں آکھیا ڳئے ایں ݙینھ دی مناسبت نال بینر لاون ، وزارت امور کشمیر چھٹی دے باوجود ایں ݙینھ دیاں تیاریاں سانڳے اقدامات چیندی پئی اے ایں تے ملازمین دے مشکور ہیسے۔ پاکستان آخری دم تئیں کشمیریاں دی جدوجہد آزادی دی حمایت جاری رکھیسی ۔ فلسطین اتے کشمیر اچ تھیوݨ آلے ظلم توں عالمی برادری چشم پوشی کریندی پئی اے انہاں دے ضمیروی جاگݨے چاہیدن اتے انہاں کوں آپݨا کردار ادا کرݨا چاہیدے ۔ حریت کانفرنس دے کنوینئر غلام محمد صفی آکھیے بھارت 5 اگست 2019 دا اقدام اسرائیلی ماڈل دے تحت اپنائے او کشمیر اچ آبادی دا تناسب تبدیل کرݨ چاہندے
